Sorğu: Amerikalıların 45 faizi dövlət borcu limitinin artırılmasını dəstəkləmir
Bakı, 10 may, AZƏRTAC
Amerikalıların, demək olar, yarısı ABŞ hakimiyyətinin defoltdan yayınmaq üçün borc tavanının qaldırılması barədə qərarının əleyhinədir.
AZƏRTAC xəbər verir ki, bu, “The Wall Street Journal” qəzetinin apardığı sosioloji rəy sorğusunun nəticələrində əksini tapıb.
Tədqiqatın nəticələrinə görə, respondentlərin 45 faizi qanunla 31,4 trilyon dollar səviyyəsində müəyyən edilən dövlət borcu tavanının qaldırılmasını dəstəkləmir. Respublikaçılardan fərqli olaraq, demokratların 74 faizi bu qərara dəstək ifadə edib.
Sorğu aprelin 11-dən 17-dək 1,5 min amerikalı arasında keçirilib.
Federal borc üzrə defoltun fəlakətli nəticələrə səbəb olacağını vurğulayan Prezident Cozef Baydenin administrasiyası ABŞ Konqresini dövlət borcu tavanını qaldırmağa çağırır. Nümayəndələr palatasına nəzarət edən respublikaçılar isə ənənəvi olaraq borc limitinin qaldırılması ideyasına skeptik yanaşır və dövlət xərclərinin ixtisarında israr edir.
İlk dəfə 1917-ci ildə borc tavanı barədə Konqres tərəfindən qəbul olunan qanun hökumətin fəaliyyətinin müəyyən müddətə qədər maliyyələşməsi üçün Maliyyə Nazirliyinə yeni dövlət istiqrazları çap etməyə imkan vermir.
Bölmənin digər xəbərləri
