Soyğunçuluq etmiş keçmiş məhkumlar tutulublar
Bakı, 18 may, AZƏRTAC
Quba rayonunun Amsar kənd sakini A.Sərdarov rayon polis şöbəsinə müraciət edərək mayın 9-da kənd ərazisindəki kafedə naməlum şəxsin ona zor tətbiq edərək 1000 manat pulunu aldığını bildirib.
Daxili İşlər Nazirliyinin mətbuat xidmətindən AZƏRTAC-a bildiriblər ki, faktla əlaqədar Cinayət Məcəlləsinin 180-ci (soyğunçuluq) maddəsi ilə cinayət işi başlanıb.
Hadisəni törətməkdə şübhəli bilinən kənd sakini, əvvəllər məhkum olunmuş Ə.Ağaməmmədov Quba Rayon Polis Şöbəsi əməkdaşlarının keçirdikləri əməliyyat tədbirləri nəticəsində saxlanılıb. O, törətdiyi əməli etiraf edib.
Mayın 16-da isə Sabunçu rayonu Y.Əliyev küçəsində şəxsiyyəti müəyyən olmayan iki nəfər 105 saylı xətt avtobusundan soyğunçuluq yolu ilə 80 manat pul aparıb.
Hadisəni törətməkdə şübhəli bilinən paytaxt sakinləri Ə.Çələbiyev və əvvəllər məhkum olunmuş R.Quliyev Sabunçu Rayon Polis İdarəsinin 13-cü polis bölməsinin əməkdaşlarının keçirdikləri əməliyyat tədbirləri nəticəsində saxlanılıblar.
Bölmənin digər xəbərləri
