SUMQAYIT MƏKTƏBİNDƏ “DƏYİRMİ MASA” KEÇİRİLMİŞDİR
“Rus dili və nitq mədəniyyəti. Polietnik qruplardan olan tələbələrə şifahi və yazılı kommunikasiyaların öyrədilməsi” mövzusunda “dəyirmi masa” 11 nömrəli ümumtəhsil məktəbində keçirilmişdir. Klassik tədris sistemi üzrə işləyən bu təhsil müəssisəsi son altı ildə “Addımbaaddım”, “Tənqidi təfəkkürün inkişafı” proqramlarında, “Harmoniya” layihəsində və üçüncü ildir “Məhdud imkanlı uşaqlar üçün proqram”da iştirak edir. Təhsil ocağında kompyuter texnologiyaları, internet uğurla tətbiq olunur, məktəbin saytı isə 2004-cü ildə respublika müsabiqəsində birinci yeri tutmuşdur.
“Dəyirmi masa”da məruzələr dinlənilmiş, orta təhsil müəssisələrində rus dilinin tədrisinə dair aktual məsələlər, məsafədən təhsilin təşkili metodikası, müasir informasiya texnologiyalarından istifadə və digər məsələlər müzakirə olunmuşdur. Qonaqlar tədbir iştirakçılarının suallarına cavab vermişlər. Məktəbin şagirdləri rus dilində maraqlı proqram təqdim etmişlər.
MDAU-nun baş müəllimi Ella Qorskaya “Rus səslərinin qoyuluşu və vurğunun tədrisi metodikası” mövzusunda ustad dərsi keçmişdir.
