Sumqayıt məktəblərinin layihələri finala vəsiqə qazanmışdır
Sumqayıt, 6 aprel (AZƏRTAC). Bakıda keçirilən “Ətraf mühitin mühafizəsi” VII Beynəlxalq Layihə Olimpiadasının (“İnepo-Euroasia”) final mərhələsinə Azərbaycandan seçilən layihələr arasında Sumqayıt məktəblərinin layihələri də yer almışdır.
AZƏRTAC xəbər verir ki, Sumqayıt təmsilçiləri olimpiadada 18 layihə ilə çıxış etmişlər. Seçilmiş layihələr arasında “Elektrik enerjisini qənaətlə işlədək, bununla atmosferi təmiz saxlayaq”, “Amarant - gələcəyin bitkisidir!”, “Kompyuter texnologiyaları və enerjiyə qənaət”, “Ekologiyaya zərər vermədən zərərvericilərə qarşı mübarizə”, “Günəş batareyaları olmadan günəş enerjisindən istifadə”, “Ekoloji yuyucu maddə - planetimizin və camaşırın xilaskarı”, “Sağlam binalar” və digərləri böyük marağa səbəb olmuşdur.
Sumqayıtın 11, 12, 13, 14, 16, 18, 23, 29 nömrəli tam orta məktəblərinin, “İstedad” və “Təfəkkür” liseylərinin, evdə fərdi təhsil məktəbinin və Ekoloji Tərbiyə və Təcrübəçilik Mərkəzinin layihələri finala vəsiqə qazanmışdır.
Bölmənin digər xəbərləri
