Sumqayıt şəhəri ərazisində ağacların qanunsuz kəsilməsi faktları aşkar edilmişdir
Bakı, 15 aprel (AZƏRTAC). Ekologiya və Təbii Sərvətlər Nazirliyinə (ETSN) Sumqayıt şəhəri ərazisində zeytun və şam ağaclarının kəsilməsi ilə bağlı daxil olmuş məlumat əsasında nazirliyin ətraf mühitin mühafizəsi departamentinin əməkdaşları tərəfindən yerində araşdırma aparılmışdır.
ETSN-dən AZƏRTAC-a bildirmişlər ki, aparılmış araşdırma zamanı yaşıllıq sahəsində yaşköküstə diametri 30-52 santimetr olan dörd ədəd eldar şamı və diametri 16 santimetr olan beş ədəd zeytun ağacının qanunsuz kəsildiyi aşkar edilmişdir. Baxış zamanı ərazidə texnika vasitəsilə torpaq qazma və hamarlama işləri aparıldığından digər ağac və kol cinslərinin kəsilməsini və ya kökündən çıxarılmasını müəyyən etmək mümkün olmamışdır.
Qeyd olunmuş faktla bağlı nazirliyin əməkdaşları tərəfindən akt tərtib edilmiş, təqsirkarın müəyyənləşdirilməsi və barəsində qanuna müvafiq tədbirlərin görülməsi məqsədilə Sumqayıt Şəhər İcra Hakimiyyətinə, Sumqayıt Şəhər Prokurorluğuna və polis idarəsinə müraciət olunmuşdur.
Ərazi ETSN-in əməkdaşları tərəfindən nəzarətə götürülmüşdür.
Bölmənin digər xəbərləri
