SUMQAYITIN 2005-Cİ İLDƏ SOSİAL-İQTİSADİ İNKİŞAFINA YEKUN VURULMUŞDUR
Şəhər icra hakimiyyətinin başçısı Vaqif Əliyev “2005-ci ildə Sumqayıtın sosial-iqtisadi inkişafının yekunları və 2006-cı il üçün vəzifələr haqqında” məruzə etmişdir. Məruzədə Sumqayıtın bütün sahə və strukturlarının 2005-ci ildə fəaliyyəti ətraflı təhlil olunmuşdur. Bildirilmişdir ki, onların işi Azərbaycan Prezidenti İlham Əliyev avqustun 12-də Heydər Əliyevin xatirə kompleksinin açılışı və buxar-qaz qurğusunun təməlinin qoyulması mərasimində iştirak etmək üçün Sumqayıtda olarkən verdiyi göstərişlərin və tövsiyələrin, yerinə yetirilməsinə yönəldilmişdir.
Sənayenin, tikintinin, nəqliyyatın, telekommunikasiyanın, şəhər təsərrüfat xidmətlərinin, sosial sahənin, sahibkarlığın inkişafının əsas istiqamətlərindən ibarət proqram ümumilikdə yerinə yetirilmişdir. İlin yekunlarına görə, iri sənaye müəssisələrində istehsalın həcmi 1 trilyon manat təşkil etmişdir ki, bu da ötənilki göstəricidən 7,7 faiz çoxdur. Şəhərin sənaye müəssisələrində orta əmək haqqı 550 min manat olan 12,2 min nəfər çalışmışdır.
Yeni istifadəyə verilmiş, habelə bərpa edilmiş onlarca müəssisə, istehsal sahəsi və sexdə iş yerləri açılmışdır. Ötən il 2856 müxtəlif profilli iş sahəsi, 2003-cü ilin oktyabrından indiyədək isə 17 min 331 iş yeri yaradılmışdır.
Sumqayıtın da problemlərinə kifayət qədər diqqət yetirilmiş regionların sosial-iqtisadi inkişafı Dövlət Proqramının tam və uğurlu yerinə yetirilməsi üçün alimlərdən və şəhərin aparıcı mütəxəssislərindən ibarət xüsusi komissiya yaradılmışdır.
Hesabat məruzəsində vurğulanmışdır ki, şəhərdə sahibkarlığın inkişafına da böyük diqqət yetirilir. Kommersiya banklarının burada fəaliyyət göstərən 20 filialı orta və kiçik biznesin inkişafına kömək edir. Bunun sayəsində özəl sektorun iqtisadiyyatda – nəqliyyatda, xidmət sahəsində, habelə şəhər büdcəsinin mədaxil hissəsində (68,3 faiz) payı artmışdır. Ötən il 1,936 milyard manatlıq məhsul istehsal edilmiş və xidmətlər göstərilmişdir ki, bu da 2004-cü illə müqayisədə 26,2 faiz çoxdur.
Bununla yanaşı, şəhər icra hakimiyyətinin başçısı mənfi faktların hələ bütünlüklə aradan qaldırılmadığı bir sıra təhsil, səhiyyə və digər müəssisələrin, habelə əhalinin işə düzəldilməsi və məşğulluğu mərkəzlərinin fəaliyyətini kəskin tənqid etmişdir. Bildirilmişdir ki, orta əmək haqqı 800 min manat və daha artıq olan iş yerləri kifayət qədər olduğu halda, vətəndaşlar iş axtarmaqda davam edirlər. Bu, profilaktika və reklam işinin aşağı səviyyəsindən xəbər verir.
Müzakirələrdə çıxış edənlər ötən ilin yekunlarını, şəhər icra hakimiyyətinin fəaliyyətini müsbət qiymətləndirmişlər. Qeyd olunmuşdur ki, 2003-cü il aprelin 3-dən sonra Sumqayıtda baş vermiş köklü dəyişikliklər Azərbaycan xalqının ümummilli lideri Heydər Əliyevin şəhər fəallarının həmin gün keçirilmiş yığıncağında söylədiyi proqram nitqində qarşıya qoyduğu vəzifələrin nə dərəcədə vacib və düşünülmüş olduğunu bir daha sübut edir.
Respublika Baş nazirinin birinci müavini Abbas Abbasov çıxış etmişdir. O bildirmişdir ki, ümumilikdə 2005-ci il ölkəmiz üçün uğurlu olmuşdur. Azərbaycan yüksək iqtisadi nəticələr əldə etmişdir. Ötən ilin yekunlarına görə ümumi daxili məhsul təxminən 27 faiz artmışdır və bu, dünyada ən yüksək göstəricidir. Azərbaycan Prezidenti İlham Əliyev dahi liderimiz Heydər Əliyevin siyasi xəttini inamla davam etdirir və ölkəmizdə ictimai-siyasi sabitlik hökm sürür, iqtisadiyyatın dinamik inkişafı müşahidə edilir ki, bu da əhalinin rifah halına müsbət təsir göstərir.
Yığıncaq iştirakçıları adından Azərbaycan Prezidenti İlham Əliyevə müraciət qəbul olunmuşdur.
Bölmənin digər xəbərləri
