SUMQAYITIN KİMYA SƏNAYESİ MÜƏSSİSƏLƏRİNİN İNKİŞAFININ YENİ MƏRHƏLƏLƏRİ MÜƏYYƏNLƏŞDİRİLƏCƏK
Sumqayıt İcra Hakimiyyətinin başçısı Vaqif Əliyev AZƏRTAC-ın müxbirinə bildirmişdir ki, şəhərin sənaye potensialının, təxminən 70 faizi kimya və neft kimyası müəssisələri təşkil edir. Məlum obyektiv və subyektiv səbəblərə görə, hazırda respublikanın kimya kompleksi müəssisələrinin burada cəmləşmiş əsas hissəsinin 30 faizi işləyir. Vəziyyəti yalnız konkret tədbirlər görməklə köklü surətdə dəyişdirmək mümkündür və bu, şəhərin bir çox problemlərinin, o cümlədən işsizliyin həllinin ən optimal yoludur.
Sumqayıtda xeyirxah ənənə - vətəndaşların qəbulunun yeni forması tətbiq edilmişdir. Şəhərin ucqar hissələrində yaşayan və sosial müdafiəyə daha çox ehtiyacı olan adamlar ayda bir dəfə icra hakimiyyəti başçısı ilə birbaşa əlaqə saxlaya bilirlər. Bütün problemlər məhz bu görüşlərdə açıqlanır. Ən başlıca problem isə əhalinin işlə təmin olunmasıdır. Ona görə də yalnız bütün sahibkarların qüvvələrini səfərbərliyə almaqla, ən qısa müddət ərzində müəssisələri yenidən işə salmaq, bu mühüm problemi qismən həll etmək mümkün olacaqdır.
Aparıcı mütəxəssislərin, sahibkarların, elmi tədqiqat institutları alimlərinin konfransda iştirakı şəhərin kimya müəssisələrinin yenidən qurulması konsepsiyasını işləyib hazırlamağa və gercəkləşdirməyə imkan verəcəkdir.
Bölmənin digər xəbərləri
