Suqovuşan, 19 mart, AZƏRTAC

Otuz ilə yaxın dövrdə erməni işğalı altında qalan Qarabağ və Şərqi Zəngəzur özünün yeni dirçəliş dövrünə qədəm qoyub. Prezident, Ali Baş Komandan İlham Əliyevin rəhbərliyi ilə Ordumuzun düşmən üzərində qazandığı şanlı Qələbə nəticəsində azadlığına qovuşmuş ərazilərimizə həyat yenidən qayıdır. Dövlətimizin başçısının işğaldan azad olunmuş ərazilərə səfərləri regionun dirçəlməsi üçün ən vacib infrastruktur layihələrinin icrası və təməlqoyma mərasimləri, tarixi-mədəni, dini abidələrin bərpası ilə müşayiət olunur. Prezident İlham Əliyev və birinci xanım Mehriban Əliyevanın martın 18-də Tərtər rayonunun Suqovuşan və Talış kəndlərinə səfəri də bu yaşayış məntəqələrinin yenidən qurulması, bərpası və inkişafında yeni mərhələ kimi yadda qalacaq. Dövlətimizin başçısı və birinci xanım səfər zamanı Talış-Tapqaraqoyunlu-Qaşaltı sanatoriyası avtomobil yolunun açılışında iştirak edib, Talış kəndində görülən işlərlə, Suqovuşan qəsəbə tam orta məktəbində yaradılan şəraitlə, Suqovuşan su anbarının və ondan çıxan magistral su kanalının əsaslı təmiri, su anbarı boyunca yaradılan turizm infrastruktur obyektlərinin tikintisi ilə tanış olub, yeni yaşayış məhəlləsinin təməlini qoyublar.

Böyük qayıdışa aparan yollar

Suqovuşan və Talış kəndləri işğaldan azad olunduqdan sonra həyata keçirilən ilk infrastruktur layihələrindən biri yolların yenidən qurulması oldu. Uzunluğu 28,8 kilometr olan Tərtər-Çaylı-Suqovuşan-Talış avtomobil yolu qısa vaxtda ikinci texniki dərəcəyə uyğun yenidən quruldu. Bu istiqamətdə növbəti layihə uzunluğu 22 kilometr olan Talış-Tapqaraqoyunlu-Qaşaltı sanatoriyası avtomobil yolunun inşasıdır. Dövlətimizin başçısı martın 18-də Talış kəndinə və Suqovuşan qəsəbəsinə səfəri zamanı bu avtomobil yolunun açılışında iştirak etdi. Yeni avtomobil yolunun eni 19 kilometrlik hissədə 9 metr, 3 kilometrlik hissədə isə 6 metr təşkil edir. Bu yolun inşası layihəsi çərçivəsində İncəçay üzərində uzunluğu 84 metr olan avtomobil körpüsü tikilib. Eni 14,5 metr olan üçaşırımlı körpü 9 ballıq seysmiklik nəzərə alınmaqla inşa edilib. Yolda aparılan tikinti işləri inşaat norma və qaydalarının tələblərinə uyğun yüksək keyfiyyətlə həyata keçirilib. Layihə üzrə yolboyu avtobus dayanacaqları inşa edilib, hərəkətin normal təşkili üçün digər zəruri infrastruktur yaradılıb.

Tərtər rayonunun işğaldan azad edilmiş Talış, Goranboy rayonunun Tapqaraqoyunlu və Qaşaltı Qaraqoyunlu kəndlərini keçməklə Naftalan şəhərinə doğru uzanan yeni yolun inşası yolboyu yerləşən yaşayış məntəqələrinin sakinlərinin rahat gediş-gəlişi ilə bərabər, bölgənin sosial-iqtisadi inkişafına da töhfə verəcək. Yeni yol, həmçinin Tərtər şəhəri ilə yanaşı, alternativ olaraq Naftalan şəhərindən də bu istiqamətdə rahat və təhlükəsiz hərəkəti təmin edəcək.

İstər Tərtərdən, istərsə də Naftalandan Suqovuşan-Talış istiqamətinə irəlilədikcə avtomobil yolunu böyük qürur və sevinc hissləri ilə izləyirik. Axı, bu yol adi yol deyil - Böyük Qayıdış yoludur. Eyni zamanda, bizi işğaldan azad edilmiş ərazilərə, ermənilər tərəfindən viran qoyulmuş yaşayış məntəqələrimizin gələcək inkişafına və xoş günlərimizə aparan yoldur.

Məktəbdə şagirdlərin yüksək səviyyədə təhsil almaları üçün hər cür şərait yaradılıb

Ermənistanın Azərbaycana qarşı 30 ilə yaxın davam edən hərbi təcavüzü nəticəsində işğal olunan rayonların təhsil infrastrukturu da tamamilə dağıdılıb. İşğaldan azad edilən ərazilərdə dağıdılan təhsil infrastrukturunun bərpası istiqamətində Prezident İlham Əliyevin müvafiq sərəncamları və tapşırıqları ilə hazırda mühüm işlər görülür. Bu, “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nda da əksini tapıb. Sənədə əsasən, tikintisi və bərpası nəzərdə tutulan təhsil ocaqlarından biri də Suqovuşan qəsəbəsindəki tam orta məktəbdir.

2022-ci il martın 20-də dövlətimizin başçısı və birinci xanım Suqovuşana səfərləri çərçivəsində qəsəbədəki yararsız vəziyyətdə olan 144 şagird yerlik tam orta məktəbin binasında olmuş, təhsil müəssisəsindəki vəziyyətlə maraqlanmışdılar. Prezident İlham Əliyev məktəb binasının əsaslı təmirinə başlanılması və işlərin yüksək səviyyədə həyata keçirilməsi ilə bağlı tapşırıqlar vermişdi. Dövlətimizin başçısının tapşırığına əsasən, məktəb binasında yüksək keyfiyyətlə həyata keçirilən əsaslı təmir işləri başa çatıb. Ərazisi bir hektar olan məktəbdə 12 sinif otağı var. Şagirdlərin yüksək səviyyədə təhsil almaları üçün sinif otaqları zəruri dərs vəsaitləri ilə təchiz edilib. Təhsil ocağında, həmçinin informatika kabineti, kitabxana, iki laboratoriya, 72 nəfərlik akt zalı və yeməkxana var. Məktəbdə internet, mebel-inventar və digər zəruri avadanlıqlar müasir tələblər səviyyəsindədir. Təhsil ocağının həyətində abadlıq işləri görülüb, futbol, basketbol və açıq oyun meydançaları yaradılıb.

Yaşayış məhəlləsində 190 mənzil inşa ediləcək

Martın 18-də Azərbaycan Respublikasının Prezidenti İlham Əliyev, birinci xanım Mehriban Əliyeva və qızları Arzu Əliyeva Suqovuşan qəsəbəsində inşa olunacaq yaşayış məhəlləsinin təməlqoyma mərasimində iştirak etdilər.

Sahəsi 2 hektardan çox olan məhəllədə 25-i birotaqlı, 80-i ikiotaqlı, 75-i üçotaqlı, 10-u isə dördotaqlı olmaqla ümumilikdə 190 mənzil inşa ediləcək.

Məhəllədə, həmçinin futbol, idman və uşaq meydançaları, transformator yarımstansiyası və digər zəruri infrastruktur obyektlərinin tikintisi nəzərdə tutulur. Burada, həmçinin geniş yaşıllıq zolaqları da salınacaq.

Su anbarı və magistral kanal əsaslı təmir edilir, turizm infrastrukturu obyektləri yaradılır

Birinci Dövlət Proqramı çərçivəsində əsas infrastruktur obyektlərinin təmir-bərpa və yenidənqurma layihələri çərçivəsində Suqovuşan su anbarının və ondan çıxan magistral su kanalının əsaslı təmiri həyata keçirilir. Su anbarının ümumi tutumu 5,9 milyon kubmetr. Bəndin ümumi hündürlüyü 28 metr, uzunluğu 600 metrdir. Su anbarının divarlarında köhnə dəmir-beton örtüyü qaşınıb çıxarılıb, yerinə yeni demir-beton örtüyü vurulur. Həmçinin oradakı bütün avadanlıqlar əsaslı təmir olunur, magistral kanalda zəruri işlər görülür. Bərpa, əsaslı təmir və yenidənqurma işlərinin bu ilin sonunadək başa çatdırılması nəzərdə tutulur.

Eyni zamanda, Suqovuşan su anbarı boyunca ilkin turizm infrastruktur obyektlərinin yaradılmasına başlanılıb. Burada Turizm İnformasiya Bürosu inşa olunur, sahilboyu park salınır, avtodayanacaq tikilir. Ərazinin dağ iqlimi, gözəl təbiət mənzərələri, su anbarı kimi amillər, eləcə də Tərtərdən və Naftalandan qəsəbəyə gedən avtomobil yollarının yenidən qurulması, Suqovuşanın turizm məkanı kimi şöhrət tapacağına zəmin yaradır.

Bəli, Prezident İlham Əliyevin erməni tapdağından azad edilmiş ərazilərimizə hər səfəri o bölgələrdəki bərpa və quruculuq işlərinin daha geniş vüsət almasına səbəb olur. İnanırıq ki, yaxın gələcəkdə Şanlı Ordumuz tərəfindən işğaldan azad edilmiş şəhər və kəndlərimizin hər biri, eləcə də Tərtər rayonunun Suqovuşan qəsəbəsi dövlətimizin iradəsi və xalqımızın əzmi ilə dünyanın diqqətini cəlb edəcək ən müasir və abad yaşayış məskənlərinə çevriləcək.

Tahir Ağaməmmədov

AZƏRTAC-ın müxbiri