SURAXANIDA VƏ SUMQAYITDA TƏBİİ QAZIN SIZMASINDAN PARTLAYIŞ BAŞ VERMİŞDİR
Daxili İşlər Nazirliyinin mətbuat xidmətindən AZƏRTAC-a bildirmişlər ki, Suraxanı rayonundakı 1-ci Bülbülə küçəsində Arif Məcnunova məxsus 1 mərtəbəli, 3 otaqlı evdə təbii qazın sızmasından partlayış baş vermişdir.
Hadisə nəticəsində evin qapı və pəncərələri sınmış, döşəmədə çatlar əmələ gəlmişdir. Xəsarət almış A.Məcnunov, arvadı Sədaqət, qızları Aytac, Günel və oğlu Fərman təcili yardım xəstəxanasının yanıq şöbəsinə yerləşdirilmişlər.
Sumqayıt şəhərində “Betonzavod” adlanan ərazidəki binada yaşayan Qardaşxan Hüseynova məxsus 2 otaqlı evdə də təbii qazın sızmasından yanğına keçən partlayış olmuşdur.
Nəticədə qapı və pəncərələr sınmış, 6 kvadratmetr sahədə evin yanar konstruksiyaları və oradakı əşyalar yanmışdır.
Xəsarət almış Q.Hüseynov və arvadı Zümrüd təcili yardım xəstəxanasının yanıq şöbəsinə yerləşdirilmişlər. Q.Hüseynov orada ölmüşdür.
Faktlarla bağlı araşdırmalar aparılır.
Bölmənin digər xəbərləri
