SÜRÜCÜLÜK VƏ ŞƏXSİYYƏT VƏSİQƏLƏRİNİN VERİLMƏSİ,NƏQLİYYAT VASİTƏLƏRİNİN ÖZGƏNİNKİLƏŞDİRİLMƏSİ İLƏ BAĞLI RÜSUMLAR DƏYİŞDİRİLƏCƏKDİR

11.11.2006 [00:38]
Çap et
A⁺ A^-

AZƏRTAC xəbər verir ki, Milli Məclisin iqtisadi siyasət daimi komissiyasının noyabrın 10-da keçirilmiş iclasında 2007-ci ilin dövlət büdcəsi zərfinə daxil olan bir sıra qanun layihələri müzakirə olunmuşdur. Komissiyanın sədri Ziyad Səmədzadə “Azərbaycan Respublikasının 2007-ci il üçün yaşayış minimumu və ehtiyac meyarının həddi haqqında” Qanun layihəsi barədə məlumat vermişdir. O demişdir ki, 2007-ci il üçün yaşayış minimumu ölkə üzrə adambaşına orta hesabla 64 manat, o cümlədən əmək qabiliyyətli əhali üçün 70 manat, pensiyaçılar üçün 49,7 manat, uşaqlar üçün 52,4 manat məbləğində müəyyən edilmişdir. Ünvanlı dövlət sosial yardımın təyin edilməsi məqsədi ilə ehtiyac meyarının həddi 2007-ci il yanvarın 1-dən 35 manat, iyulun 1-dən isə 40 manat məbləğində müəyyənləşdirilmişdir.

“Dövlət rüsumu haqqında” Qanun layihəsinin müzakirəsi zamanı bildirilmişdir ki, sürücülük və şəxsiyyət vəsiqələrinin verilməsi, zərgərlik məmulatlarının əyarlanması və damğalanması, nəqliyyat vasitələrinin özgəninkiləşdirilməsi və s. məsələlər üzrə rüsumlar dəyişdiriləcəkdir. Bu qanun yanvarın 1-dən qüvvəyə minəcəkdir.

Sonra “Sosial sığorta haqqında” Qanuna təklif edilən əlavələrə və dəyişikliklərə baxılmışdır. Layihədə deyilir ki, əmək qabiliyyətinin müvəqqəti itirilməsinə, eləcə də hamiləliyə və doğuma görə, ən azı 6 ay müddətində məcburi dövlət sosial sığorta haqqı ödəmiş şəxslər müavinət ala biləcəklər.

Sonra “Büdcə sistemi haqqında” Qanuna dəyişikliklər və əlavələr edilməsi barədə” və “Banklar və kredit təşkilatları tərəfindən əhalinin əmanətləri üzrə ödənilən faiz məbləğlərindən, habelə investisiya qiymətli kağızlar üzrə divident və faizlərindən gəlir vergisinin tutulması üzrə güzəştlərin müəyyən edilməsi haqqında” Qanunun qüvvədəolma müddətinin uzadılması barədə” qanun layihələrinə baxılmışdır.

Sonda komissiya üzvlərinin, mütəxəssislərin rəy və təklifləri nəzərə alınmaqla qanun layihələrinin Milli Məclisin müzakirəsinə çıxarılması qərara alınmışdır.