Şuşa şəhərinin mədəni həyata qovuşması üçün mühüm tarixi addımlar atılır
Bakı, 8 may, AZƏRTAC
Xalqımız son 17 ildə Şuşa şəhərinin düşməndən xilas olunacağı günün tezliklə gələcəyinə, doğma Qarabağımızın “döyünən ürəyinin” yağılardan təmizlənəcəyinə qəti əmin idi. Bu inamı, ümidi Azərbaycan Prezidenti, Ali Baş Komandan İlham Əliyevin qətiyyəti sayəsində Ordumuzun gündən-günə artan güc-qüdrəti yaratmışdı. Ötən il sentyabrın 27-də başlayan əks-həmlə əməliyyatları ilə Silahlı Qüvvələrimiz addım-addım Şuşaya yaxınlaşırdı, bu, dövlətimizin başçısının dediyi kimi, uğura bir nəfəs qədər yaxın olduğumuzdan xəbər verirdi, Ali Baş Komandanımızın Türkiyə mətbuatına verdiyi müsahibələrin birində “Şuşa azad edilmədən bu əməliyyat tamamlanmış sayılmaz, yarımçıq qalar”, - söyləməsi də bu Zəfərə yönələn ümid və əminliyimizi daha da artırırdı.
Nəhayət o gün gəldi. Azərbaycan Prezidenti, Ali Baş Komandan İlham Əliyev ötən il noyabrın 8-də xalqımızı Şuşanın işğaldan azad edilməsi münasibətilə təbrik edərək dedi: “Böyük fəxarət və qürur hissi ilə bəyan edirəm ki, Şuşa şəhəri işğaldan azad edildi! Şuşa bizimdir! Qarabağ bizimdir! Bu münasibətlə bütün Azərbaycan xalqını ürəkdən təbrik edirəm. Bütün şuşalıları ürəkdən təbrik edirəm.
İyirmi səkkiz il yarım işğal altında olan Şuşa azad edildi! Şuşa indi azaddır! Biz Şuşaya qayıtmışıq! Biz bu tarixi Qələbəni döyüş meydanında qazandıq. 2020-ci il noyabrın 8-i Azərbaycan tarixində əbədi qalacaqdır. Bu tarix əbədi yaşayacaq. Bu, bizim şanlı Qələbəmizin, zəfərimizin günüdür!”
Bunu AZƏRTAC-a açıqlamasında AMEA-nın Riyaziyyat və Mexanika İnstitutunun böyük elmi işçisi, mexanika üzrə fəlsəfə doktoru Emin Bağırov deyib.
E.Bağırov vurğulayıb ki, Prezident İlham Əliyev və Birinci vitse-prezident Mehriban xanım Əliyeva və qızları Leyla Əliyeva bu il yanvarın 14-də işğaldan azad edilən Şuşa şəhərində olmaları bəlkə də taleyin xoş qisməti idi. Dövlətimizin başçısı Şuşa şəhərində üçrəngli bayrağımızı qaldırdıqdan sonra bu barədə dedi: “Biz qalib xalqıq. Mən Şuşaya son dəfə 39 il bundan əvvəl gəlmişəm. 39 il bundan əvvəl iki dəfə gəlmişəm və birinci dəfə yanvarın 14-də gəlmişəm. Bax, bu gün, yanvarın 14-də yenə də buradayıq. Bu dəfə müzəffər Azərbaycan Ordusunun, qalib Azərbaycan Ordusunun Ali Baş Komandanı kimi gəlmişəm. Düşmənin belini qıran Ordunun Ali Baş Komandanı kimi gəlmişəm və burada müqəddəs bayrağın altında, qəhrəman hərbçilərin önündə deyirəm ki, biz bu torpaqlarda əbədi yaşayacağıq! Biz Şuşanı və dağıdılmış bütün başqa şəhər və kəndlərimizi bərpa edəcəyik. Dağıdılmış bütün tarixi abidələrimizi bərpa edəcəyik…”.
Dövlətimizin başçısı həmin səfəri çərçivəsində keçirdiyi görüşlərdəki çıxışlarında ulu öndərimiz Heydər Əliyevin təşəbbüsü ilə Şuşa şəhərinin abadlaşdırılması istiqamətində ardıcıl layihələr gerçəkləşdirildiyini, maddi-mədəni abidələrlə zəngin bu şəhərdə milli ruhun yüksək səviyyədə reallaşması üçün tədbirlər həyata keçirildiyini xatırlatdı.
Təəssüf ki, dövlətimizin başçısının vurğuladığı kimi, o zaman heç kimin ağlına gələ bilməzdi ki, bir neçə ildən sonra burada separatizm baş qaldıracaq, Ermənistan Azərbaycana qarşı təcavüz edəcək, Qarabağın incisi olan Şuşa işğal altında qalacaq, tarixi abidələrimiz, məscidlərimiz, Vaqifin məqbərəsi dağıdılacaq. Azərbaycan xalqının çoxəsrlik irsi Qarabağ diyarından silinməyə məruz qalacaq.
Emin Bağırov daha sonra qeyd edib ki, əslində, ermənilər bu vandallıqları törətmək üçün bir fürsət gözləyirmişlər. Belə bir məqam isə Ulu Öndərimizin Moskvaya getməsindən sonra yarandı. Prezident İlham Əliyevin dediyi kimi, “əgər Heydər Əliyev 1982-ci ildə Bakıdan Moskvaya getməsəydi, əgər onu Moskvaya təyin etməsəydilər, heç vaxt burada separatizmin baş qaldırılmasına imkan verməzdi: “Ancaq Heydər Əliyev hakimiyyətə gələndə artıq Şuşa işğal altında idi, Kəlbəcər işğal altında idi, Laçın işğal altında idi, Daşaltı işğal altında idi, bütün ətraf bölgələr işğal altında idi və Dağlıq Qarabağla Ermənistan arasında coğrafi bağlantı yaradılmışdı”.
Erməni vandalizminin dəhşətli nəticələrini aradan qaldırmaq üçün bu gün Şuşada tikinti-quruculuq, abadlıq işləri görülür. Maddi-mədəni abidələrimiz bərpa edilir, şəhər dünyanın ən möhtəşəm yaşayış sahələrindən birinə çevrilir. Dövlətimizin başçısının ötən il noyabrın 8-də xalqımızı Şuşanın işğaldan azad edilməsi münasibətilə təbrik edərkən dediyi “Əziz Şuşa, biz səni dirçəldəcəyik!” sözləri uğurla gerçəkləşir. Prezident İlham Əliyevin “Şuşa şəhərinin Azərbaycanın mədəniyyət paytaxtı elan edilməsi haqqında” 7 may 2021-ci il tarixli Sərəncamı isə Qarabağın incisinin əvvəlki görkəminin bərpası, habelə ənənəvi dolğun mədəni həyatına qovuşması baxımından atılan mühüm tarixi addımlardan biridir.
Bölmənin digər xəbərləri
