Süveyş kanalında yeni genişləndirilmiş hissə sınaqdan keçirilib
Bakı, 29 dekabr, AZƏRTAC
Misir Süveyş kanalının cənubunda genişləndirilmiş 10 kilometrlik hissənin uğurla sınaqdan keçirildiyini elan edib.
AZƏRTAC xəbər verir ki, Süveyş kanalı idarəsinin rəhbəri Osama Rabia dərinləşdirmə işləri başa çatdıqdan sonra yeni ərazidən iki gəminin keçdiyini bildirib. O, layihənin kanalın tutumunu və səmərəliliyini əhəmiyyətli dərəcədə artıracağını deyib. Osama Rabia, həmçinin əlavə edib ki, genişləndirilmiş hissə gəmilərin güclü axınlara və hava şəraitinə davam gətirməsinə yardımçı olacaq.
Ekspertlərin sözlərinə görə, bu, əsas kanalda baş verəcək qəzalar və ya fasilələr zamanı ehtiyat marşrut kimi fəaliyyət göstərəcək və fövqəladə hallarda belə qlobal ticarətin davamlı gedişini təmin edəcək.
Bir müddət öncə, Misir Prezidenti Əbdül Fəttah əs-Sisi regional vəziyyət səbəbindən 2024-cü ildə Süveyş kanalının gəlirlərinin 60 faizdən çox azaldığını deyib. Belə ki, Qırmızı dəniz və Bab əl-Məndəb boğazındakı problemlər kanalın 7 milyon dollar itirməsi ilə nəticələnib.
Bölmənin digər xəbərləri
