Tacikistan və Türkiyə üç illik əməkdaşlıq proqramı imzalayıb
Bakı, 10 yanvar, AZƏRTAC
Tacikistan və Türkiyənin Xarici İşlər nazirlikləri 2024-2026-cı illəri əhatə edən əməkdaşlıq proqramı imzalayıb.
AZƏRTAC xəbər verir ki, bu barədə Tacikistan XİN-in məlumatında deyilir. Sənəd Tacikistanın xarici işlər naziri Sirociddin Muhriddinlə Düşənbəyə rəsmi səfər edən türkiyəli həmkarı Hakan Fidan arasında keçirilən görüşdən sonra imzalanıb.
Nazirlər görüş zamanı siyasət, iqtisadiyyat, ticarət, investisiya, təhsil, elm, mədəniyyət, səhiyyə və turizm sahələrində qarşılıqlı fəaliyyət məsələlərini müzakirə ediblər. Bundan başqa, təhlükəsizliyin təmin edilməsi, terrorizmlə mübarizə, həmçinin əməkdaşlığın hüquqi bazasının gücləndirilməsi mövzularına toxunublar.
Qeyd edək ki, Türkiyənin xarici işlər naziri Hakan Fidan yanvarın 9-da axşam saatlarında Düşənbəyə səfər edib. Səfər çərçivəsində onun Tacikistan Prezidenti Emoməli Rəhmonla görüşəcəyi gözlənilir.
Bölmənin digər xəbərləri
