Bakı, 31 oktyabr (AZƏRTAC). Oktyabrın 31-də Azərbaycan Yazıçılar Birliyinin (AYB) “Natəvan” klubunda tanınmış şair və publisist, “Kredo” qəzetinin baş redaktoru Əli Rza Xələflinin 60 illik yubileyi qeyd edilmişdir.

AZƏRTAC xəbər verir ki, müasir Azərbaycan tənqidinin tanınmış simalarının, şair və yazıçıların, Cəbrayıl ziyalılarının iştirak etdikləri tədbirdə Əli Rza Xələflinin həyat və yaradıcılığından söhbət açılmışdır.

Tədbiri giriş sözü ilə açan filologiya elmləri doktoru, professor Nizaməddin Şəmsizadə bildirmişdir ki, Əli Rza Xələfli tariximizin iki əsrinin, iki möhtəşəm minilliyin qovuşuğunda yaşayıb-yaradan istedadlı Azərbaycan ziyalısıdır. Cəbrayıl rayonunun Xələfli kəndində dünyaya göz açan və bu gün məcburi köçkünlük həyatı yaşayan şair iyirmi ildən artıqdır ki, qəlbində Qarabağ ağrısı ilə vətəndaşlıq ruhunda şeir, poema, roman və kəsərli publisistik əsərlər yazır. “Həsrət körpüsü” və “Araz ağrısı” kitabları ilə o, bir filosof şair, “Od” romanı və “Üçüncü dünyanın qorxusu” povesti ilə istedadlı nasir, “Meyar”, “Ölməzlik nəğməsi”, “Həyatın dastanı” kitabları ilə kəsərli qələmə malik publisist kimi ədəbiyyata daxil olmuşdur.

N.Şəmsizadə diqqətə çatdırmışdır ki, çağdaş Azərbaycan ədəbi-tarixi mühitində böyük nüfuza malik “Kredo” qəzeti bir vətəndaş, ziyalı kimi onun ən böyük əsəridir. On beş ilə yaxındır ki, “Kredo” Azərbaycan ədəbi-ictimai mühitində “Sovremennik” jurnalının XIX əsr rus tarixində oynadığı rolu oynamaqdadır. Ədəbiyyatın, millətin və Vətənin fədakarı olan Əli Rza Xələflinin nəşr etdirdiyi “Kredo” qəzetinin redaksiyası bu gün söz və qələm adamlarının görüş yeridir.

Dərin istedada, qibtə olunacaq dərəcədə yaradıcılıq enerjisinə, zəhmətsevərliyə və fəal həyat mövqeyinə malik olan Əli Rza Xələflinin əsərlərinin baş mövzusunun Allah, söz, cahan və insan münasibətləri olduğu vurğulanmışdır. Qeyd olunmuşdur ki, onun əsərlərinin dəyərini yalnız bu münasibətlər müstəvisində müəyyən etmək olar.

Azərbaycan Yazıçılar Birliyinin sədri, Xalq Yazıçısı Anar isə Əli Rza Xələflinin ədəbiyyatımıza təmənnasız xidmət göstərdiyini qeyd etmişdir. Bildirmişdir ki, Şimali və Cənubu Azərbaycanı birləşdirən Xudafərin körpüsünə öz yaradıcılığında xüsusi yer ayıran Əli Rza Xələflinin “Kredo” qəzeti yazıçılarla oxucular arasında körpü rolu oynayır.

Yubilyara Azərbaycan Yazıçılar Birliyi adından hədiyyə təqdim edilmişdir.

Tanınmış tənqidçi, professor Təyyar Salamoğlu Əli Rza Xələflinin ömür və sənət yolu barədə məruzə ilə çıxış etmişdir.

Məruzəçi bildirmişdir ki, Əli Rza Xələfli Azərbaycan Dövlət Pedaqoji Universitetinin filologiya fakültəsini fərqlənmə diplomu ilə bitirmiş, Cəbrayılın Şahvəlli, Tatar və Aşağı Xələfli kəndlərində müəllim işləmişdir. Həmin illərdəki pedaqoji fəaliyyətinə görə “Qabaqcıl maarif xadimi” fəxri adına layiq görülmüşdür. 1980-ci illərin əvvəllərindən “Xudafərin”, “Qoşa qanad”, “Qarabağ” və “Həyat” qəzetlərində xüsusi müxbir, şöbə müdiri vəzifələrində çalışmışdır. 1999-cu ildən “Kredo” qəzetinin baş redaktoru kimi qəzetçilik fəaliyyəti onun qeyri-adi dərəcədə bitib tükənməyən orijinal publisistikasını cilalayıb formalaşdırmışdır.

Qeyd edilmişdir ki, Əli Rza Xələflinin “Ocağımın işığı” (2001), “İçərişəhər: daşlar, insanlar” (2001), “Damcılı” (2011), “Bu dünyanın mehmanısan” (2011), “Azadlığın qanı” (2011) və bu yaxınlarda Xəzər Universitetinin nəşriyyatında çap olunmuş “Bir bayatı çağırdım” kitabları onun hələlik bütün poetik yaradıcılığını əhatə edən dəyərli nəşrlərdir. Əli Rza Xələflinin tədqiqat xarakterli ədəbi-tənqidi görüşləri isə “Fənayənin sualları” (2006), “Dilimiz-varlığımız” (2009), “Adı Şadiman olanın...” (2009), “Yaddaşa aparan yollar” (2010), “Həyatın romanı” (2011) və “Ölməzlik nəğməsi” (2013) kitablarında öz əksini tapmışdır.

Bildirilmişdir ki, Əli Rza Xələfli Həsən bəy Zərdabidən, Cəlil Məmmədquluzadədən, Əli bəy Hüseynzadədən gələn yolun layiqli davamçısı vəzifəsini yerinə yetirir. Mərhum professor Abbas Hacıyev “Sənətin işığında” adlı kitabını bütövlükdə Əli Rza Xələflinin yaradıcılığına həsr etmişdir.

Görkəmli dilçi alim, professor Qəzənfər Kazımov çıxışında şairin “Araz ağrısı” poemasını Azərbaycanın Qarabağ faciəsinə həsr olunmuş ən sanballı bir əsər kimi qiymətləndirmişdir. Demişdir ki, Əli Rza Xələfli bu əsəri ilə bizi xalqın ruhunun ifadəçisi olan canlı, sadə və doğma dilimizin poetik cazibəsində saxlamaq gücündədir.

Tədbirdə professorlardan Buludxan Xəlilov, Himalay Qasımov, yazıçı Yasir Nəsirli, şair Yusif Nəğməkar, tənqidçi Sabir Bəşirov, tənqidçi-ədəbiyyatşünas Qurban Bayramov, Cəbrayıl Rayon İcra Hakimiyyətinin başçısı Mahmud Quliyev və digər çıxış edənlər Əli Rza Xələflini dərin biliyə, zəngin söz ehtiyatına, yüksək yaradıcılıq temperamentinə, orijinal erudisiyaya və hüdudsuz təxəyyülə malik olan bir ziyalı kimi səciyyələndirmişlər. Diqqətə çatdırılmışdır ki, Əli Rza Xələflinin əsərləri daim ədəbi tənqidin diqqətində olmuşdur. Xüsusilə şairin son kitabları barədə mətbu orqanlarda çoxlu sayda müsbət rəylər dərc edilmişdir.

Çıxış edənlər “Qızıl qələm”, “Araz”, Qılınc və qələm”, Beynəlxalq Rəsul Rza, Şahmar Əkbərzadə adına ədəbiyyat mükafatlarına layiq görülmüş ziyalımızı 60 illik yubileyi münasibətilə təbrik etmiş, ona yeni yaradıcılıq uğurları arzulamışlar.

Tədbirdə, həmçinin Əməkdar Artist Ağalar Bayramov yubilyarın əsərlərindən nümunələr səsləndirmişdir.

Sonda tədbirin təşkilatçılarına və iştirakçılarına minnətdarlığını bildirən Əli Rza Xələfli yeni şeirlərini oxumuşdur.