Tarix və Etnologiya İnstitutundan kitab hədiyyəsi
Bakı, 25 iyun, AZƏRTAC
AMEA-nın Abbasqulu Ağa Bakıxanov adına Tarix İnstitutunun bazasında Abbasqulu Ağa Bakıxanov adına Tarix və Etnologiya İnstitutu həm tarixi biliklərin təbliği, həm də tarixçi-mütəxəssislər, tarix müəllimləri, universitetlərin tarix fakültələrinin tələbələri və tarixsevərlərin kitabxanasının daha da zənginləşdirilməsi məqsədilə son illərdə nəşr etdirdiyi kitabları oxucularına hədiyyə edir.
Bu barədə AZƏRTAC-a institutdan məlumat verilib.
Hədiyyə ediləcək kitabların adları və miqdarı ilə institutun saytından tanış ola bilərsiniz. Kitabları əldə etmək üçün institutun Təchizat və xidmət şöbəsinə iyulun 3-dən 7-dək müraciət edib siyahı üzrə arzu edilən kitabların sıra sayını bildirmək lazımdır.
Qeyd olunan müddət başa çatdıqdan sonra, iyulun 10-dan 14-dək kitablar institutda müvafiq xidmət tərəfindən komplektləşdiriləcək. İyulun 17-dən 21-dək kitablar təhvil veriləcək. Hər bir şəxsə siyahıda olan kitablardan ən çoxu beşinin verilməsi nəzərdə tutulur.
Kitabların əldə edilməsi üçün baş direktorun adına ərizə və ona qoşma kimi şəxsiyyət vəsiqəsinin surəti tələb olunur.
Bölmənin digər xəbərləri
