“TAYMS”: AVROPA BİRLİYİNİN ANKARA İLƏ MÜNASİBƏTLƏRDƏ MÜDRİKLİK GÖSTƏRMƏSİNİN VAXTI ÇATMIŞDIR
Avropa Birliyinin Danimarkanın paytaxtı Kopenhagendə başa çatmış zirvə toplantısının yekunlarını Türkiyə ilə yanaşı, bütün türk dünyası da səbirsizliklə gözləyirdi. Lakin AB ölkələri Türkiyə ilə danışıqlara başlamağın konkret tarixi kimi, 2004-cü ilin dekabrını müəyyənləşdirmişdir. Türkiyə isə bu danışıqlara 2003-cü ildə başlamağı təklif edirdi. Zirvə görüşünün həmin qərarı Avropada birmənalı qarşılanmamışdır.
Dekabrın 14-də İngiltərənin “Tayms” qəzetində Kopenhagen toplantısı və AB-nin Türkiyəyə münasibəti barədə məqalə dərc edilmişdir. Məqalədə deyilir ki, dörd illik gərgin danışıqlardan sonra keçmiş kommunist düşərgəsinin, habelə Aralıq dənizi regionunun 10 ölkəsi Avropa Birliyinin tam hüquqlu üzvü oldu. Bu, ümumi bazarın tətbiq edildiyi vaxtdan bəri AB-də ən miqyaslı və daha mühüm dəyişiklikdir.
Lakin, qəzetin fikrincə, yenicə genişləndirilmiş Birliyin gələcək taleyi ilə bağlı narahatlıq hələ də qalır. Çünki AB ölkələrinin bir çoxu təşkilata eyni vaxtda bu qədər yeni üzv qəbul edilməsinin onun həyat qabiliyyətinə necə təsir göstərəcəyi barədə düşünür. Bəzi ölkələr, o cümlədən Fransa imtiyazlı vəziyyətdə olan öz fermerlərini rəqabətdən qorumağa çalışırlar. Bir sıra ölkələr, xüsusən Almaniya, Fransa və Avstriya əmək bazarında gələcək vəziyyətlə bağlı təşviş keçirdiklərini gizlətmirlər.
Kipr hələ birləşməmiş onun Avropa Birliyinə qəbul edilməsi məsələsi də narahatlıq doğurur. Müşahidəçilər ehtiyat edirlər ki, ikiyə bölünmüş ölkənin AB sıralarına qəbul olunması onun sabitliyinə mənfi təsir göstərəcəkdir.
“Tayms” nəzərə çarpdırır ki, Kipr məsələsinin həllində Türkiyənin xoş məramı Avropa və ümumən Qərb üçün son dərəcə vacibdir. Bax, buna görə də Türkiyənin AB-yə qəbul edilməsi haqqında məsələ çox önəmlidir. Qəzet xatırladır ki, Türkiyə hökuməti Avropa Birliyinə daxil olmaq üçün siyasi sahədə, iqtisadiyyat və insan hüquqları sahəsində islahatlar aparmaq əzmində olduğunu nümayiş etdirmişdir. Üstəlik, Türkiyə kürdlər barəsində qüvvədə olan məhdudiyyətlərin zəiflədilməsi üçün bir sıra tədbirlər görmüşdür.
Məqalədə daha sonra deyilir: Ankara 40 ildir ki, Avropa Birliyində yer tutmağa çalışır və ona tez və müsbət cavab verilməsinə layiqdir. Avropa Birliyinin sıralarına qoşulmağa çox səy göstərən və Avropanın maraqlarının qorunması üçün çox önəmli olan ölkə ilə - Türkiyə ilə münasibətlərdə Birliyin müdriklik göstərməsinin vaxtı gəlib çatmışdır.
Bölmənin digər xəbərləri
