Təbriz qəzeti Azərbaycanın Zəfər Gününə həsr olunmuş məqalə dərc edib
Bakı, 5 noyabr, AZƏRTAC
Təbrizin “Məhde Təməddun” qəzetində Azərbaycanın Zəfər Gününə həsr olunmuş məqalə dərc edilib.
AZƏRTAC xəbər verir ki, ölkəmizin Təbrizdəki baş konsulluğunun dərc etdirdiyi məqalədə 2020-ci il 8 noyabr tarixinin Şuşanın işğaldan azad edildiyi gün olduğu, Azərbaycanın qədim və tarixi şəhərinin rəşadətli ordumuzun, igid oğullarımızın qanı, canı bahasına əsarətdən qurtulduğu bildirilir. Diqqətə çatdırılır ki, bununla da 44 gün davam edən Vətən müharibəsinin taleyi həll olundu, düşmənin siyasi-hərbi rəhbərliyi öz məğlubiyyətini etiraf etdi.
Məqalədə vurğulanır ki, Ali Baş Komandan İlham Əliyevin rəhbərliyi ilə Azərbaycan Ordusu 44 gün davam edən döyüşlərdə düşməni diz çökdürdü, ölkəmizin ərazi bütövlüyü bərpa edildi, tarixi ədalət bərqərar oldu. Beləliklə, BMT Təhlükəsizlik Şurasının 27 il ərzində kağız üzərində qalan və işğal edilmiş Azərbaycan torpaqlarının qeyd-şərtsiz azad olunmasını tələb edən qətnamələri yerinə yetirildi.
Qəzet 44 günlük Vətən müharibəsinin xronologiyasını təfsilatı ilə təbrizli oxucuların diqqətinə çatdırır. Qeyd olunur ki, Şuşada, Cəbrayılda, Füzulidə, Zəngilanda, Qubadlıda, Ağdamda, Kəlbəcərdə, nəhayət, Azərbaycanın dilbər guşələrindən biri olan Laçında üçrəngli Bayrağımızın dalğalanması Azərbaycan tarixinin ən parlaq səhifələri oldu. Ali Baş Komandanın vəd etdiyi kimi, qədim Şuşa işğaldan azad edildi, bu şəhər uğrunda döyüşlər isə xarici hərbi ekspertlər tərəfindən yüksək qiymətləndirilir.
Məqalədə erməni işğalçılarının 30 ilə yaxın müddətdə Azərbaycan şəhərlərinin infrastrukturunu dağıtması, qəsəbə və kəndləri, təbiəti, tarix-mədəniyyət abidələrini məhv etməsi, məscidləri viran qoyması barədə məlumatlar da yer alıb. Diqqətə çatdırılır ki, artıq bu gün həmin dini məbədlərdə əzan səsləri ucalır, qədim mədəniyyət abidələri sürətlə bərpa olunur. Prezident İlham Əliyev Füzuli şəhərində olarkən bir daha bəyan etdi ki, ərazi bütövlüyümüzü bərpa etmişik, təcavüzkarları işğal edilmiş torpaqlardan qovmuşuq, ikinci erməni dövlətinin yaradılmasına imkan verməmişik və indi heç bir status haqqında söhbət gedə bilməz; vahid Azərbaycan dövləti var.
Oxuculara məlumat verilib ki, 2023-cü il 19-20 sentyabr tarixlərində Azərbaycan Ordusunun həyata keçirdiyi lokal xarakterli antiterror tədbirləri nəticəsində Qarabağda separatizmə son qoyuldu və xunta rejimi əbədi olaraq ləğv edildi. Bununla da müasir, müstəqil Azərbaycanın yeni tarixi yazılmağa başladı. Cəmi 23 saat 43 dəqiqə ərzində erməni separatçıları ağ bayraq qaldırmağa məcbur oldular. Beləliklə, 24 saatdan az müddətdə həyata keçirilən antiterror tədbirləri nəticəsində Azərbaycan ərazisində qanunsuz yerləşən erməni silahlı birləşmələri tam şəkildə tərksilah edildi və ölkəni tərk etdi. Qarabağda qeyri-qanuni xunta rejimi ləğv edildi, separatçıların əsas rəhbərləri həbs olundu və Azərbaycan dövlət suverenliyini tam təmin etdi. Bu münasibətə Prezident İlham Əliyev sentyabrın iyirmisinin Azərbaycan Respublikasında Dövlət Suverenliyi Günü kimi təsis edilməsi haqqında Sərəncam imzalayıb.
Məqalədə qeyd olunur ki, Azərbaycanın işğaldan azad edilmiş ərazilərinə Böyük Qayıdışa dair I Dövlət Proqramı ilə torpaqlarımız yenidən cənnətə çevrilir. Qarabağda sürətli quruculuq, bərpa işləri aparılır, keçmiş məcburi köçkünlər öz doğma yurdlarına qayıdırlar. Böyük Qayıdış Proqramının birinci mərhələsi başa çatdıqda - 2026-cı ilin sonunda Qarabağ və Şərqi Zəngəzurda 140 min insan məskunlaşacaq.
Qəzet sonda yazır: “Bu gün fəxrlə və böyük qürur hissi ilə deyə bilərik ki, bu tarixi Zəfər ömrünü Azərbaycan xalqına həsr etmiş, ən böyük arzusu və həyat amalı ölkəmizin ərazi bütövlüyünün bərpası olan Ümummilli Lider Heydər Əliyevin ruhunu şad edən milli nailiyyətdir. Ulu Öndər Heydər Əliyevin müəyyən etdiyi dövlətçilik strategiyasının bütün elementləri 44 günlük Vətən müharibəsində özünü bir daha təsdiqlədi. Prezident İlham Əliyevin liderliyi ilə dövlət-xalq vəhdəti Azərbaycanın gücünü və qüdrətini bütün dünyaya nümayiş etdirdi”.
Bölmənin digər xəbərləri
