TEHRANDA AZƏRBAYCAN SİLAHLI QÜVVƏLƏRİ GÜNÜNƏ HƏSR EDİLMİŞ MƏRASİM KEÇİRİLMİŞDİR
AZƏRTAC-ın xüsusi müxbiri xəbər verir ki, ölkəmizin İrandakı səfirliyində Azərbaycan Silahlı Qüvvələrinin yaradılmasının 90 illik yubileyi münasibətilə mərasim keçirilmişdir.
Tədbirdə Tehranda fəaliyyət göstərən diplomatik korpusun və beynəlxalq təşkilatların rəhbərləri, İranda akkreditə olunmuş hərbi attaşelər, İranın dövlət rəsmiləri, şəhər ictimaiyyətinin nümayəndələri, KİV təmsilçiləri iştirak etmişlər.
Mərasim ümummilli lider Heydər Əliyevin səfirlikdəki büstü önünə əklil qoymaqla başlanmışdır. Səfir Abbasəli Həsənov qonaqları Heydər Əliyev güşəsi ilə tanış etmişdir.
Azərbaycan Respublikasının İrandakı hərbi attaşesi polkovnik Mehman Süleymanov Silahlı Qüvvələrimizin tarixi, milli ordumuzun həyat yolu barədə məlumat vermişdir.
Müstəqil Azərbaycanda əsası ulu öndər Heydər Əliyev tərəfindən qoyulmuş ordu quruculuğu siyasətini Prezident İlham Əliyevin uğurla davam etdirdiyini diqqətə çatdıran natiq bildirmişdir ki, Ermənistan-Azərbaycan, Dağlıq Qarabağ münaqişəsinin sülh yolu ilə tənzimlənməsi istiqamətində aparılan danışıqlar hələ ki, nəticə vermir. Lakin işğalçı Ermənistan yaxşı bilir ki, Azərbaycan Silahlı Qüvvələri Ali Baş Komandan İlham Əliyevin rəhbərliyi ilə ölkənin ərazi bütövlüyünü bərpa etməyə hər an hazırdır.
Qonaqlara Azərbaycana aid xatirə hədiyyələri paylanmışdır.
Bölmənin digər xəbərləri
