Təhsil müəssisələrində müvafiq ixtisasların akkreditə olunması barədə qərar qəbul edilmişdir
Bakı, 21 may (AZƏRTAC). Təhsil Nazirliyində Akkreditasiya Komissiyasının növbəti iclası keçirilmişdir.
Təhsil Nazirliyindən AZƏRTAC-a bildirmişlər ki, iclasda Azərbaycan Milli Konservatoriyası (AMK) nəzdində Musiqi Kolleci, Şirvan Dövlət İqtisadiyyat və Humanitar Kolleci, Bakı Dövlət Sosial İqtisadi Kollecinin akkreditasiyasının nəticələri müzakirə olunmuşdur.
AMK nəzdində Musiqi Kolleci üzrə akkreditasiya komissiyasının sədri Həcər Babayeva bu təhsil müəssisəsində tədrisin təşkili vəziyyətinin təhlil edildiyini diqqətə çatdırmışdır.
Şirvan Dövlət İqtisadiyyat və Humanitar Kolleci üzrə akkreditasiya komissiyasının sədri Fərrux Məmmədov bu təhsil ocağının tədris şəraiti, maddi-texniki bazası və pedaqoji heyəti haqqında məlumat vermişdir.
Bakı Dövlət Sosial İqtisadi Kolleci üzrə akkreditasiya komissiyasının sədri Lətif İsmayılov kollecin ümumi fəaliyyətindən danışmış, müvafiq göstəriciləri qeyd etmişdir.
Hər üç tədris müəssisəsi üzrə akkreditasiyanın nəticələrinə dair iclas iştirakçılarını maraqlandıran suallar cavablandırılmış, təkliflər verilmişdir.
Təhsil naziri Misir Mərdanov orta ixtisas təhsili müəssisələrinin akkreditasiya prosesinin daha səmərəli təşkili məsələləri barədə fikirlərini bildirmişdir.
Hər üç təhsil müəssisəsinin fəaliyyəti “kafi” qiymətləndirilmiş və müvafiq ixtisasların akkreditə olunması barədə qərar qəbul edilmişdir.
Bölmənin digər xəbərləri
