“Təmiz Şəhər” ASC tələbələr arasında ekoloji maarifləndirilmə tədbiri keçirmişdir
Bakı, 2 aprel (AZƏRTAC). “Təmiz Şəhər” ASC gənc nəslin tullantıların idarə edilməsi və ətraf mühitin mühafizəsi sahəsində biliklərinin artırılması məqsədi ilə Azərbaycan Dövlət Neft Akademiyasında ekoloji maarifləndirilmə tədbiri keçirmişdir.
ASC-dən AZƏRTAC-a bildirmişlər ki, tədbirdə “Təmiz Şəhər” ASC-nin Ətraf Mühitin Mühafizəsi şöbəsinin müdiri Sabit Zeyniyev “Dağ-mədən mühəndisliyi” ixtisasının və “Tempus” proqramı çərçivəsində “Ətraf mühit və neft sənayesi” ixtisası üzrə təhsil alan tələbələrə “Bərk məişət tullantılarının idarə edilməsi” mövzusunda mühazirələr oxumuşdur.
Mühazirələr zamanı tələbələrə bərk məişət tullantılarının anlayışı, termin və təyinləri, bərk məişət tullantılarının idarə olunmasının ekoloji konsepsiyası, 2012-ci ilin sonunda tam istismara verilmiş Bərk Məişət Tullantılarının Yandırılması və Bərk Məişət Tullantılarının Çeşidlənməsi Zavodları və İçəri şəhərdə tullantıların çeşidlənməsi layihəsi haqqında ətraflı məlumat verilmişdir.
Həmçinin tullantıların çeşidlənməsi və yandırılması prosesini əyani olaraq izləmək məqsədi ilə cari ilin mart ayından etibarən zavodlara məlumat turlarına start verildiyi və istəyən hər bir tələbənin bu turlarda iştirak edə biləcəyi vurğulanmışdır.
Bölmənin digər xəbərləri
