Tokio hökuməti paytaxtda COVID-19 virusu ilə bağlı vəziyyəti araşdırmaqda davam edir
Tokio, 6 may, AZƏRTAC
Tokio hökuməti Yaponiya paytaxtında COVID-19 virusu ilə bağlı son vəziyyəti araşdıraraq fövqəladə vəziyyət rejiminin uzadılması məqsədilə mərkəzi hökumətə müraciət etməyi nəzərdən keçirir.
AZƏRTAC Kyodo agentliyinə istinadla xəbər verir ki, bu barədə qərarın mayın 6-da günün ikinci yarısında mütəxəssislərlə məsləhətləşmələrdən sonra qəbul ediləcəyi gözlənilir.
Bildirilir ki, hazırda paytaxt Tokio da daxil olmaqla Osaka, Kioto və Hyoqo prefekturalarında aprelin 25-də qəbul edilən fövqəladə vəziyyət rejiminin müddətinin iki həftədən bir ayadək uzadılması məsələsi müzakirə olunur.
Tokioda virusun daha təhlükəli yeni ştamlarının aşkar edilməsi ilə əlaqədar paytaxt hökuməti fövqəladə vəziyyət rejimini mayın sonlarınadək uzatmağın mümkünlüyünü araşdırır.
Qeyd edilir ki, Tokio ilə yanaşı, vəziyyətin daha ağır olduğu Osaka, Kioto və Hyoqo prefekturalarının hökumətləri də mərkəzi hökumətdən fövqəladə vəziyyət rejimini uzatmağı planlaşdırırlar.
Mayın 5-də jurnalistlərin paytaxtda vəziyyətlə bağlı sualını cavablandıran Tokionun qubernatoru xanım Yuriko Koike bildirib ki, vəziyyət hələ də çox ciddi olaraq qalır, yoluxma ilə əlaqədar gündəlik müayinələrin sayı 2500-ə çatıb. Bu ötən ilin sonu, cari ilin əvvəllərində ölkədə üçüncü dalğa başlanarkən yaranan vəziyyətə bərabərdir.
Yaponiyada bu gün başa çatan “Qızıl həftə” ərzində yoluxmaların sayı əvvəlki həftə ilə müqayisə azalsa da, Y.Koike əhalini evdə qalmağa, digər şəxslərlə ünsiyyətdən çəkinməyə çağırıb.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
