Tokioda koronavirusa gündəlik yoluxmada antirekord qeydə alınıb
Tokio, 8 may, AZƏRTAC
Mayın 8-də Yaponiyanın paytaxtı Tokioda koronavirusa gündəlik yoluxmada antirekord qeydə alınıb - 1121 nəfər.
AZƏRTAC xəbər verir ki, bu barədə Tokio administrasiyası məlumat yayıb. Bildirilir ki, bu, həm aprelin sonlarından paytaxtda fövqəladə vəziyyət rejiminin elan edilməsindən, həm də yanvarın 22-dən bəri ən yüksək göstəricidir.
Qeyd edək ki, hökumətin qəbul etdiyi qərara görə Tokioda və daha üç prefekturada fövqəladə vəziyyət rejimi mayın 11-dək davam etməli idi. Lakin yeni yoluxma hallarının sayının artması ilə əlaqədar Baş nazir Yoşihide Suqa fövqəladə vəziyyət rejimini mayın sonunadək uzatmağı qərara alıb. Həmçinin vəziyyətin ağır olduğu Aiçi və Fukuoka prefekturalarında da fövqəladə vəziyyət rejimi elan edilib.
Yaponiyada fövqəladə vəziyyət rejiminin tələblərinə əsasən, ictimai iaşə müəssisələrindən spirtli içkilər satmamaq, yerli sakinlərdən ehtiyac olmadan evlərini tərk etməmək, müəssisələrin rəhbərlərindən isə əməkdaşları məsafədən işə cəlb etmək xahiş edilir.
Mayın 8-də, həmçinin ölkə üzrə koronavirusa yoluxmuş ağır vəziyyətdə olan xəstələrin sayında da antirekord qeydə alınıb - 1131 nəfər.
Ümumilikdə Yaponiyada virusa yoluxanların sayı 634 min nəfəri ötüb, 10800 nəfərin isə həyatını itirdiyi bildirilir.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
