Trans-Xəzər Beynəlxalq Nəqliyyat Marşrutunun daşıma qabiliyyəti 10 milyon tona çatdırılacaq
Astana, 23 dekabr, AZƏRTAC
Trans-Xəzər Beynəlxalq Nəqliyyat Marşrutunun hazırkı ötürücülük gücü 6 milyon ton təşkil edir.
AZƏRTAC xəbər verir ki, bu barədə Qazaxıstanın nəqliyyat naziri Marat Karabayev məlumat verib.
Onun sözlərinə görə, son 4 ildə bu dəhliz üzrə daşımaların həcmi 800 min tondan 4,1 milyon tonadək artıb ki, bu da 5 dəfə artım deməkdir. Bu müddət ərzində malların çatdırılma müddəti 58-60 gündən 13-15 günə endirilib.
“Dəhlizin gələcək inkişafı üçün Azərbaycan, Türkiyə və Gürcüstanla birlikdə daşıma prosesi zamanı yaranan maneələrin aradan qaldırılmasına yönəlmiş yol xəritəsi təsdiq edilib. Bizim yaxın məqsədimiz marşrutun ötürücülüyünü 10 milyon tona çatdırmaqdır”, - deyə nazir vurğulayıb.
Orta dəhliz kimi tanınan Trans-Xəzər Beynəlxalq Nəqliyyat Marşrutu Çini Qazaxıstan, Xəzər dənizi, Azərbaycan, Gürcüstan və Türkiyə vasitəsilə Avropa ölkələri ilə birləşdirir.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
