TRASEKA EKSPERTLƏRİNİN BAKIDA NÖVBƏTİ İCLASI KEÇİRİLİR
Noyabrın 27-də TRASEKA Proqramına daxil olan dövlətlərin ekspertlərinin növbəti ikigünlük iclası işə başlamışdır. Iclas “Tranzit rüsumları və tarifləri üzrə vahid siyasət” regional layihəsi çərçivəsində keçirilir. Bu layihə TRASEKA-nın iştirakçısı olan dövlətlərin ərazisində səmərəli və şəffaf tarif siyasətinin aparılmasına yönəlmişdir və onun həyata keçirilməsi bu nəqliyyat dəhlizinin rəqabət qabiliyyətinin yüksəlməsinə kömək edəcəkdir.
İclasda avtomobil nəqliyyatı, vergi qanunvericiliyi sahələrində ekspertlər, beynəlxalq hüquq mütəxəssisləri iştirak edirlər.
Tarif rüsumlarının və yol vergilərinin dərəcələri haqqında məsələlər, müxtəlif dövlətlərin nəqliyyat işçiləri arasında qarşılıqlı əməkdaşlığın səviyyəsini yüksəldə və möhkəmləndirə biləcək tədbirlərin müəyyənləşdirilməsi müzakirə edilir.
Çıxış edən mütəxəssislər bildirmişlər ki, hazırda makroiqtisadi sabitlik şəraitində Azərbaycanda əsas avtomobil yolları bərpa edilir, TRASEKA proqramında iştirak edən dövlətləri birləşdirən tranzit yolları yeniləşdirilir və modernləşdirilir.
Gündəliyin aktual məsələlərdən biri - TRASEKA-ya daxil olan ölkələrin sərhədlərini keçən avtodaşıyıcılar və digər avtomobil nəqliyyatı vasitələri üçün tarif problemi də müzakirə olunmuşdur.
Iclas öz işini davam etdirir.
Bölmənin digər xəbərləri
