TRASEKA PROQRAMI İLƏ BAĞLI SEMİNAR KEÇİRİLMİŞDİR

16.06.2004 [10:57]
Çap et
A⁺ A^-

AZƏRTAC-ın xüsusi müxbiri xəbər verir ki, Daşkənddə Avropa Birliyinin və TRASEKA proqramının himayəsi ilə bu proqramın üzvü olan dövlətlərin nəqliyyat və gömrük təşkilatlarının nümayəndələri üçün seminar keçirilmişdir.

Azərbaycanı bu tədbirdə Nəqliyyat Nazirliyinin şöbə müdiri Əli Qasımovun başçılığı ilə nümayəndə heyəti təmsil etmişdir.

Seminarı ABŞ, Fransa, Almaniya və Hollandiyadan gəlmiş mütəxəssislər aparmışlar.

Tədbirdə sərhəd-keçid məntəqələrində gömrük-yoxlama qaydalarının, qeyri-rəsmi ödənişlərin aradan qaldırılması, nəqliyyatda bir dayanacaq və bir pəncərə prinsipinin həyata keçirilməsi və digər mövzularda müzakirələr olmuşdur.

Ölkəmizin nümayəndələri Azərbaycanda bu sahədə görülən və görüləcək işlər barədə məlumat vermişlər.