TUFANLI HAVADA MOBİL TELEFON İNSAN HƏYATI ÜÇÜN ÇOX TƏHLÜKƏLİDİR
Həm yerli, həm də əcnəbilərdən ibarət kiçik turist qrupu Çin səddini seyr etmək üçün səfərə çıxmış və burada pis hava səraiti onları haqlamışdır. Orada turistlərdən biri zəng vurmaq fikrinə düşmüş, bunun nə ilə nəticələnəcəyinin fərqinə varmadan, düymələri basaraq, dəstəyi qulağına yaxınlaşdırmışdır. Fizika qanunlarına görə, mobil telefon ildırımötürənə çevrilmiş və çox güclü cərəyan axını birbaşa ətrafın gözəlliyini seyr edən insanlara tərəf yönəlmişdir. Yalnız xoş təsadüf nəticəsində ölən olmamış, lakin hamı zərər çəkmiş, turistlərin hamısı ağır yanıqla xəstəxanaya çatdırılmışdır. Vəziyyət daha ağır faciə ilə nəticələnə bilərdi. Belə ki, bir müddət bundan əvvəl Çində tufan zamanı mobil telefonla zəng vurmağa cəhd göstərən bir nəfər həlak olmuşdu.
Ekspertlər deyirlər ki, hətta telefonla danışmadıqda belə, sadəcə olaraq, qoşulmuş telefon həyat üçün təhlükəli ola bilər. Telefon cibdə olanda da aparatın buraxdığı elektromaqnit dalğaları elektrik cərəyanını cəzb edir.
Yeri gəlmişkən, cibdə olan mobil telefonlar günəşli havada da təhlükə mənbəyidir. Məsələn, ötən il Hollandiyada 15 yaşlı yeniyetmənin cibindəki təzə telefon birdən-birə alışmışdır. Nəticədə, oğlan ciddi yanıqla xəstəxanaya düşmüş, telefon istehsal edən şirkət isə bu faktı ətraflı surətdə araşdırmaq zərurəti ilə üzləşmişdir.
