“TÜRK DÜNYASININ CƏFAKEŞ ÖVLADI”
Əlişir Nəvai adına Özbəkistan Milli Kitabxanasında türk dünyasının tanınmış simalarından biri İsmayıl Qasprinskinin 150 illiyi ilə bağlı elmi konfrans keçirilmişdir. Konfransda Özbəkistanın tanınmış alimləri, ədəbiyyat və incəsənət xadimləri, Daşkənddəki səfirliyimizin əməkdaşları, tələbələr iştirak etmişlər.
Kitabxananın direktoru Zuxriddin İsmayılov konfransı açaraq İsmayıl Qasprinskinin türk dünyasına verdiyi töhfələrdən söz açmış, konfransa göndərilən təbrik teleqramlarını oxumuşdur.
Sonra professor Azad Şərafətdinov, professor Naim Kərimov, Krım Tatarları Məclisinin Mərkəzi Asiya üzrə nümayəndəsi Əli Xamzin, Daşkənddəki Krım Tatarları Mədəniyyət Mərkəzinin sədri Lemana Cəmilova, dosent Baybuta Dostkoriyev və başqaları çıxış edərək İsmayıl Qasprinskinin müəllim, alim və jurnalistlik fəaliyyətindən söhbət açmış, onu türk dünyasının cəfakeş övladı adlandırmışlar.
Azad Şərafətdinov öz çıxışında İ.Qasprinskinin jurnalistlik fəaliyyətindən danışaraq demişdir: - Ötən əsrin əvvəllərində nəşrə başlamış “Tərcüman” qəzeti Bakı, Daşkənd, Ufa, Orenburq, Kazan şəhərlərini müsəlman mədəniyyətinin mərkəzləri kimi təqdim edir, türkdilli xalqların həyatı, məişəti, tarixi ilə bağlı materiallar verirdi. Ədib qəzetdə türk dünyasının maariflənməsi ilə bağlı 220-dən artıq məqalə çap etdirmişdir. Biz çox şadıq ki, tanınmış maarifçinin həyatı və yaradıcılığı ilə bağlı Azərbaycan və Özbəkistan alimləri də tədqiqat işi aparmış, kitablar yazmışlar. Onun həyatı türk dünyasının gəncləri üçün bir örnəkdir.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
