Türkan qəsəbəsində Ulu Öndərin 100 illik yubileyi münasibətilə ağacəkmə aksiyası keçirilib
Bakı, 22 fevral, AZƏRTAC
Müstəqil Azərbaycanın memarı və qurucusu, Ümummilli Lider Heydər Əliyevin anadan olmasının 100 illiyi ilə əlaqədar Fövqəladə Hallar Nazirliyinin (FHN) Əsaslı Tikinti İdarəsi tərəfindən Bakının Türkan qəsəbəsində ağacəkmə aksiyası keçirilib.
Nazirlikdən AZƏRTAC-a bildirilib ki, aksiyanın keçirilməsində əsas məqsəd ölkəmizdə ekologiyanın qorunması və ətraf mühitin sağlamlaşdırılmasına hər zaman böyük əhəmiyyət vermiş Ulu Öndər Heydər Əliyevin əziz xatirəsini yad etmək, Ümummilli Liderin yaşıllaşdırma ənənələri irsini davam etdirmək, insanlar arasında ekoloji mədəniyyəti, təbiətə olan qayğı hissini təbliğ etməkdən ibarət olub. Təsadüfi deyildir ki, dahi rəhbər Heydər Əliyevin əsasını qoyduğu ekoloji siyasət hazırda onun layiqli davamçısı Azərbaycan Respublikasının Prezidenti, Müzəffər Ali Baş Komandan İlham Əliyev tərəfindən uğurla davam etdirilərək ölkəmizdə ətraf mühitin mühafizəsi və ekoloji təhlükəsizliyin təmin edilməsi istiqamətində ardıcıl tədbirlər həyata keçirilir.
Aksiya zamanı idarənin əməkdaşları tərəfindən zeytun ağacları əkilib, ərazidə olan bitkilərə qulluq göstərilib, yaşıllıq zonasında təmizlik işləri aparılıb.
Bölmənin digər xəbərləri
