TÜRKİYƏ-İRAQ STRATEJİ ƏMƏKDAŞLIQ ŞURASI YARADILACAQDIR
AZƏRTAC-ın xüsusi müxbiri xəbər verir ki, Türkiyənin Baş naziri Rəcəb Tayyib Ərdoğan iyulun 10-da Bağdadda iraqlı həmkarı Nuri əl-Maliki ilə görüşündə iki ölkənin nazirliklərinin birgə fəaliyyətini tənzimləyəcək Strateji Əməkdaşlıq Şurasının yaradılması haqqında qərar qəbul olunduğunu bəyan etmişdir. Bu qurum bütün məsələləri hökumət başçıları səviyyəsində həll etməyə imkan verəcəkdir.
Rəcəb Tayyib Ərdoğan İraq hökumətinin PKK terror təşkilatı ilə mübarizədə Türkiyəyə göstərdiyi yardıma görə təşəkkürünü bildirmiş, Ankaranın hər zaman İraqın ərazi bütövlüyü və suverenliyini dəstəklədiyini demişdir. Baş nazir demişdir ki, Türkiyə İraqla siyasi təhlükəsizlik, müdafiə, enerji, iqtisadiyyat, mədəniyyət və su ehtiyatlarından istifadə səhələrində daha fəal əməkdaşlıq etməyi planlaşdırır. Yaxın 3-4 ildə iki ölkə arasında ticarət dövriyyəsi həcminin 25 milyard dollara çatdırılması nəzərdə tutulur.
Türkiyənin Baş naziri beynəlxalq ictimaiyyətə müraciət edərək söyləmişdir ki, İraqda sülhə və sabitliyə nail olunmayanadək qlobal sülhün təmin olunması da mümkün deyildir. Bütün dünya İraqın yenidən qurulmasını dəstəkləməlidir. İraq xalqı hər zaman türkiyəli dostlarının yardımına bel bağlaya bilər.
Bölmənin digər xəbərləri
