TÜRKİYƏ JURNALI AZƏRBAYCAN ALİMİNİN ƏSƏRİNİ DƏRC EDİR
Filologiya elmləri doktoru, professor Teymur Əhmədovun uzun illər apardığı araşdırmalar nəticəsində yazdığı “Erməni xəyanəti və Andronik Ozanyanın qanlı əməlləri” kitabı Türkiyədə də böyük maraqla qarşılanmışdır. İstanbulda çıxan “Kuvayi milliyə” aylıq tarix və mədəniyyət jurnalı bu ilin fevralından başlayaraq hər nömrəsində həmin kitabı hissə-hissə dərc edir.
Jurnalın bu təşəbbüsü oxucular arasında geniş əks-səda doğurmuşdur. Onlar redaksiyaya müraciət edərək minnətdarlıqlarını bildirir, bu qəbildən olan yazıların daha çox çap olunmasını arzulayırlar.
Professor Yaşar Ağdoğan redaksiyaya göndərdiyi məktubda Azərbaycan aliminin kitabını yüksək qiymətləndirərək, fikrini bu sözlərlə tamamlayır: “Professor, doktor Teymur Əhmədovun bu araşdırması Türkiyənin erməni lobbiləri ilə qarşı-qarşıya gəldiyi bir zamanda oxucuların əlinə keçəcəkdir. Biz türklərin xarakterinin kökündə insani hisslər dayanır. Qəlbimizdə kin və nifrət olmaz, hər kəsə gözlədiyindən daha çox səmimiyyət göstəririk. Bütün bunları düşmənlər bəlkə də acizlikdən irəli gələn xüsusiyyət kimi başa düşürlər. Əslində, ən doğrusunu biz edirik. Bəzən də qoynumuzda Andronik kimi ilanları bəsləyirik. Amma yenə də xarakterimizdəki insani hisslərin daha güclü olması ucbatından onun kimi vəhşilərin yetişməsinə, cinayətlərin göz-görə baş alıb getməsinə səbəb oluruq. Tarixdə çirkin əməlləri ilə tanınan Andronik adlı bir məlunun azəri türklərinin başına gətirdiyi müsibətləri bilirik, lakin bunların Teymur bəyin kitabında tarixi sənədlərə istinad edilərək verilməsi bir çox həqiqətin ortaya çıxmasına imkan yaratmış, Andronikin qanlı əməllərini, yerə-göyə sığmayan cinayətlərini açıqlamışdır. Əminəm ki, “Kuvayi milliyə” jurnalında dərc edilən yazı ermənilərlə bağlı bir çox həqiqətlərin açılmasına kömək edəcəkdir. Mən deyərdim ki, bu yazı utanmadan, çəkinmədən “soyqırım”dan danışan ermənilərə çox yaxşı cavabdır. Cürbəcür yerlərdən dəstək alan ermənilər çirkin əməllərindən əl çəkmirlər. Ona görə də bizim ən mühüm vəzifəmiz türklərin düşməni olan hər kəsin keçmişini tarixi sənədlər əsasında ortaya qoymaqdır”.
Tədqiqatçı, professor Camal Anadolunun “Erməni dosyası” kitabının dördüncü nəşrinə Teymur Əhmədovun bu əsəri də əlavə edilmişdir. Həmin kitab bu yaxınlarda çapdan çıxacaqdır.
Bölmənin digər xəbərləri
