Türkiyədə dövlət müəssisələri üçün tətbiqi nəzərdə tutulan qənaət paketi açıqlanıb
İstanbul, 13 may, Günel Karatepe, AZƏRTAC
Türkiyədə dövlət müəssisələri üçün tətbiq olunması nəzərdə tutulan “Qənaət və Səmərəlilik Paketi”nin tərkibi açıqlanıb.
AZƏRTAC xəbər verir ki, bu barədə Türkiyə Prezidenti Administrasiyasında ölkənin vitse-prezidenti Cevdet Yılmazla xəzinə və maliyyə naziri Mehmet Şimşəkin iştirakı ilə keçirilən görüşdə bildirilib.
Nazir inflyasiya və qiymətlərin yüksək olması ilə mübarizə, eləcə də bunu minimuma endirmək məqsədilə tətbiq olunacaq paketin 6 fevral zəlzələlərindən sonra yenidənqurma işlərinin davam etdiyi dövrdə təbii hal olduğunu bildirib.
Qeyd edilib ki, Ədalət və İnkişaf Partiyası (AK Parti) hakimiyyətinin ən mühüm xüsusiyyətlərindən biri də maliyyə intizamı, səmərəlilik və qənaətdir. Son 20 ildə büdcə kəsirinin milli gəlirə nisbəti 2,4 faiz təşkil edib. Hazırda atılacaq addım vəsaitə qənaət məqsədi daşıyan ilk cəhd deyil, sonuncu da olmayacaq.
Diqqətə çatdırılıb ki, qarşıdan gələn üç il üçün nəzərdə tutulan yeni paketə əsasən, bu müddət ərzində təcili tibbi yardım, müdafiə və təhlükəsizlik kimi sahələrdə məcburi ehtiyaclar istisna olmaqla, dövlət müəssisələrində yeni nəqliyyat vasitələrinin alınması və icarəsi dayandırılacaq. Qanunla icazə verilən hallar istisna olmaqla, xarici nəqliyyat vasitələrinin istifadəsi qadağan ediləcək, artıq avtomobillər ləğv olunacaq. Müdafiə və təhlükəsizlik sahələri istisna olmaqla, ictimai nəqliyyatın mövcud olduğu yerlərdə personalın servis xidməti ləğv ediləcək.
Bu müddət ərzində zəlzələ riskinə aid binalar istisna olmaqla, dövlət strukturları üçün nəzərdə tutulan yeni tikililərin alınması və tikintisi dayandırılacaq. Yeni binaların icarəsinə icazə verilməyəcək və mövcud icarələri tədricən ləğv edəcəyik. Təqaüdə çıxanların sayı qədər yeni kadrlar işlə təmin olunacaq. Dəstək proqramlarının sayı azaldılacaq, onlayn iş modelləri hazırlanacaq.
Paket çərçivəsində dövlət müəssisələrinin idarə heyətlərinin maaşları məhdudlaşdırılacaq. Zəlzələlər və məcburi xərclər istisna olmaqla, mal və xidmətlərin satın alınması üzrə vəsaitlər 10 faiz, investisiya ayırmaları isə 15 faiz azaldılacaq. Beynəlxalq görüşlər və milli bayramlar istisna olmaqla, böyük tədbirlər təşkil edilməyəcək.
Vitse-prezident Cevdet Yılmaz bildirib ki, resurslardan səmərəli istifadə və qənaət ilə bağlı bu yeniliklərə iki mühüm amil təkanverici təsir göstərdi. Birincisi, ötən il baş verən zəlzələnin yaratdığı fəsadları tez bir zamanda aradan qaldırmaq zərurəti, ikincisi isə pandemiyadan sonra bütün dünyanın gündəminə çevrilən inflyasiya ilə mübarizə. “Bu gün təklif edilən paket öz-özlüyündə deyil, vahid çərçivədə irəli sürülən və bir-birini dəstəkləyən digər paketlərlə birlikdə məna daşıyır. Bu paketlə daha az vəsait hesabına daha çox layihə həyata keçirəcəyik”, - deyən vitse-prezident vurğulayıb ki, bu dövr ərzində zəlzələ bölgəsi ilə bağlı nəzərdə tutulan xərclərdə heç bir kəsinti olmayacaq. Diqqətə çatdırılıb ki, ilkin hesablamalarda zəlzələlərin vurduğu zərərin dəyəri təqribən 104 milyard dollar təşkil edib.
Bölmənin digər xəbərləri
