Türkiyədə koronavirusdan gündəlik ölüm sayı iki dəfə azalıb
Ankara, 8 may, AZƏRTAC
Türkiyə hökumətinin yeni növ koronavirus (COVID-19) infeksiyasına qarşı təsirli tədbirləri nəticəsində gündəlik yoluxma və ölüm sayları təxminən iki dəfə azalıb. Mayın 8-də ölkə üzrə 33 min 687 nəfər üzərində test aparılıb. Onlardan 1848 nəfər virusa yoluxub. Bu gün yoluxanların ümumi sayı mayın 7-si ilə müqayisədə 3292 nəfər çox, yoluxanlar isə 129 nəfər azdır.
AZƏRTAC xəbər verir ki, bu barədə son rəqəmləri nazir Fahrettin Koca sosial şəbəkədə paylaşıb. Gün ərzində 3 min 412 nəfər sağalıb, 48 nəfər dünyasını dəyişib.
Ölkə üzrə ölənlərin ümumi sayı 3 min 689 nəfərə, sağalanların sayı isə 86 min 396 nəfərə çatıb. Bu vaxtadək 1 milyon 298 min 806 nəfər testdən keçirilib. Hazırda 1212 xəstə reanimasiyada, 653 nəfər süni nəfəs aparatına qoşulmuş haldadır.
Qeyd edək ki, Türkiyədə COVID-19 pandemiyası ilə mübarizədə tətbiq olunan qadağalar mərhələli şəkildə yumşaldılır. İlkin mərhələyə mayın 11-dən başlanılacaq. Bunla bağlı hökuməti ciddi narahat edən infeksiyanın ikinci dalğası riskidir. Xəbərdarlıq olunur ki, heç kəs məhdudiyyətlərin yumşalmasından sui-istifadə etməməlidir.
Sabir Şahtaxtı
AZƏRTAC-ın xüsusi müxbiri
Ankara
Bölmənin digər xəbərləri
