Ukrayna 100 “Rafale” alacaq – bəs 13 milyard avronu kim ödəyəcək?
Paris, 18 noyabr, AZƏRTAC
Fransa və Ukrayna tarixi hərbi saziş imzalayıb: Kiyev 100 “Rafale” döyüş təyyarəsi almaq niyyətindədir. Lakin təyyarələrin çatdırılması illər çəkəcək, ödəniş isə hələ sual altındadır.
AZƏRTAC xəbər verir ki, yerli mediada bu saziş həm də Avropanın Ukraynanı tək qoymamaq və Rusiyanın yeni təcavüz cəhdlərinə qarşı strateji dəstək mesajı kimi təqdim edilir. Ancaq qısa müddətdə dronlar, müdafiə sistemləri və idarə olunan bombaların Ukraynaya çatdırılacağı bildirilir.
Fransa Prezidenti Emmanuel Makron və Ukrayna Prezidenti Volodimir Zelenski tarixi hərbi saziş çərçivəsində Ukraynanın 100 “Rafale” döyüş təyyarəsi almaq niyyətini təsdiqləyən sənədi imzalayıblar. Tədbir Villakuble (Villacoublay) hərbi hava bazasında, Fransa və Ukrayna bayraqları önündə “Rafale” təyyarəsi nümayiş etdirilərək keçirilib.
Saziş rəsmi sifariş deyil, hələ ki, yalnız niyyətin ifadəsidir. Təyyarələrin çatdırılması bir neçə il çəkə bilər, çünki “Dassault Aviation” hazırda ayda yalnız iki “Rafale” istehsal edir. Hər bir “Rafale” təchizatlı versiyada təxminən 130 milyon avro qiymətindədir. 100 təyyarə üçün baxım və texniki xidmət xərcləri istisna olmaqla, ümumi məbləğ 13 milyard avrodur. Bu isə əsas sual yaradır: ödəməni kim edəcək? Bildirilir ki, hazırda maliyyələşdirmənin bir neçə variantı müzakirə olunur. Bunların arasında Avropa Komissiyasının uzunmüddətli kredit sistemi və dondurulmuş Rusiya aktivlərinin istifadəsi nəzərdən keçirilir.
Bölmənin digər xəbərləri
