Ukrayna ərazisinə qanadlı raket və kamikadze dronları ilə hücum edilib
Kiyev, 3 dekabr, AZƏRTAC
Rusiya qoşunları gecə saatlarında Ukrayna ərazisinə qanadlı raketlə, həmçinin 12 hücum pilotsuz təyyarəsi ilə hücum edib. Demək olar ki, bütün hədəflər hava hücumundan müdafiə vasitələri ilə məhv edilib.
Bu barədə AZƏRTAC Ukrayna Silahlı Qüvvələrinin Hərbi Hava Qüvvələrinə istinadla məlumat yayıb.
“Dekabrın 3-nə keçən gecə Rusiyanın Primorsko-Axtarsk vilayətindən “Şahed” tipli 12 hücum PUA-sı və Belqorod vilayətinin hava məkanından X-59 idarəolunan təyyarə raketi ilə hücuma keçib”, - Ukrayna Silahlı Qüvvələrinin Hərbi Hava Qüvvələrinin bəyanatında deyilir.
Bildirilir ki, hücum PUA-ları işğal olunmuş Xerson vilayətinin ərazisindən daxil olaraq bir neçə istiqamətdə olub.
Nikolaev bölgəsində, "Cənub" hava komandanlığının məsuliyyət zonasında, “Şahed”lərin əksəriyyəti hava hücumundan müdafiə ilə məhv edilib. Qalanları Xmelnitski vilayətinin Starokonstantinov bölgəsində vurulub.
Hava Hücumundan Müdafiə Qüvvələrinin döyüş işi nəticəsində 10 ədəd “Şahed-136/131” hücum PUA-sı məhv edilib. X-59 idarə olunan raketinin hədəfinə çatmadığı da bildirilir.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
