UKRAYNANIN ƏHALİSİ TƏXMİNƏN 4 MİLYON NƏFƏR AZALMIŞDIR
İTAR-TASS xəbər verir ki, 11 illik müstəqillik dövrü ərzində Ukraynanın əhalisi 4 milyon nəfər azalmışdır. Əhalinin getdikcə azalması 1993-cü ildən müşahidə olunur və demoqrafların proqnozlarına görə, bu proses bundan sonra da davam edəcəkdir. Mütəxəssislər bunu qismən həyat səviyyəsinin aşağı olması ilə izah edirlər.
Ukrayna Dövlət Statistika Komitəsinin məlumatına görə, hazırda ölkədə 48,15 milyon adam yaşayır ki, bu da ümumi siyahıyaalmasının keçirildiyi ötən ilin dekabr ayındakına nisbətən 1 faiz azdır. Dövlət Statistika Komitəsinin şərhinə görə, Ukraynanın bütün regionlarında ölüm halları doğum hallarından artıqdır. Əhali mühacirət hesabına da azalır.
SSRİ dövründə Ukraynada axırıncı dəfə əhalinin siyahıya alınması 1989-cu ildə olmuşdur. O zaman ölkədə 51,45 milyon, 1990-cı illərin əvvəlində isə 52 milyon adam yaşayırdı.
Ukraynanın 454 şəhərindən yalnız beşində bir milyondan çox əhali yaşayır. 37 şəhərin 100 mindən 500 minə qədər, 9 şəhərin isə 500 mindən çox əhalisi var. Ölkə əhalisinin təxminən 67 faizi şəhərlərdə yaşayır. Kiyevin əhalisi isə 2,6 milyona çatmışdır.
Bölmənin digər xəbərləri
