SİYASƏT
Ulu öndər Heydər Əliyev jurnalist əməyinə daim yüksək qiymət verirdi
Bakı, 18 iyul (AZƏRTAC, Ceyhun Rüstəmov). İyulun 18-də Yeni Azərbaycan Partiyasının (YAP) təşkilatçılığı ilə “Heydər Əliyev və Azərbaycan mediası” mövzusunda “dəyirmi masa” keçirilib.
AZƏRTAC xəbər verir ki, milli mətbuat günü münasibətilə təşkil olunan “dəyirmi masa”nı YAP Siyasi Şurasının və İdarə Heyətinin üzvü, partiyanın mətbuat və ictimaiyyətlə əlaqələr komissiyasının sədri Nizami Xudiyev açdı. 1875-1877-ci illərdə Həsən bəy Zərdabinin redaktoru olduğu “Əkinçi” qəzetinin ölkədə milli təfəkkürün və ictimai fikrin formalaşmasında önəmli rolundan danışan N.Xudiyev qeyd etdi ki, milli mətbuatın demokratik dəyərlər üzərində təşəkkülü yalnız Azərbaycan müstəqillik qazandıqdan sonra ulu öndər Heydər Əliyevin apardığı siyasət nəticəsində mümkün olub. Ulu Öndərin senzuranın ləğvi barədə qərarı ölkədə söz, fikir, məlumat azadlığının təmin edilməsinə şərait yaratdı. Böyük dövlət xadimi mətbuata, jurnalistlərə münasibətdə göstərdiyi şəxsi örnək, nümunə ilə də hamıya dərs verirdi. Eyni zamanda, Heydər Əliyev jurnalistlərə demokratiya dərsi keçir, onları Azərbaycan mətbuatının mütərəqqi ənənələrini qoruyub saxlamağa, inkişaf etdirməyə səsləyirdi.
Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli milli mətbuatımızın müstəqillik illərində keçdiyi yoldan danışaraq, Azərbaycan mediasının inkişafında Ulu Öndərin xidmətlərini xüsusi vurğuladı. Qeyd etdi ki, 1990-cı illərdə Azərbaycan mətbuatı çətin dövrünü yaşayır, qəzetlərin tirajları azalır, bu isə onların maliyyə vəziyyətinə mənfi təsir göstərirdi. Ulu Öndərin 1993-cü ildə hakimiyyətə qayıdışından sonra bu sahədə vəziyyət yaxşılığa doğru dəyişməyə başladı. Milli mətbuatımızın inkişafı, kütləvi informasiya vasitələrinin maddi-texniki və maliyyə bazasının gücləndirilməsi, söz, məlumat və fikir azadlığı üçün daha geniş imkanların yaradılması istiqamətində önəmli addımlar atıldı. Ulu Öndərin göstərişi ilə qəzetlərin Azərbaycan Nəşriyyatına böyük həcmdə borcları donduruldu, sonradan isə ləğv edildi.
Mediaya dövlət qayğısının sonrakı illərdə də davam etdirildiyini vurğulayan V.Səfərli qeyd etdi ki, mətbuata maliyyə yardımının ayrılması, jurnalistlərə fəxri adların verilməsi, onların sosial problemlərinin həlli KİV-in inkişafını stimullaşdıran amillərdəndir. Jurnalistlərin mənzil şəraitinin yaxşılaşdırılması məqsədilə Prezident İlham Əliyevin tapşırığına əsasən KİV işçiləri üçün tikilən birinci bina ötən il istifadəyə verilib. Gələn il ikinci bina da hazır olacaq.
Daha sonra Mətbuat Şurasının sədri Əflatun Amaşov, Milli Televiziya və Radio Şurasının sədri Nuşirəvan Məhərrəmli, Milli Məclisin deputatları, “Azərbaycan” qəzetinin baş redaktoru Bəxtiyar Sadıqov, Jalə Əliyeva və “525-ci qəzet”in baş redaktoru Rəşad Məcid milli mətbuatımızın böyük inkişaf yolu keçdiyini vurğulayaraq, Ulu Öndərin jurnalist əməyinə daim yüksək qiymət verdiyini bildirdilər. Qeyd olundu ki, media işçiləri Heydər Əliyevi təkcə dövlət başçısı kimi deyil, eyni zamanda, bir dost, onların zəhmətini qiymətləndirən, qayğısına qalan sirdaş kimi qəbul edirdilər. Milli mətbuata göstərilən bu diqqət və qayğı hazırda Prezident İlham Əliyev tərəfindən layiqincə davam etdirilir. Bütün bunların nəticəsidir ki, Azərbaycan mediası müasir dövrün tələbləri ilə ayaqlaşır, vətəndaş cəmiyyəti quruculuğuna özünəməxsus töhfələr verir.