Ulu öndər Heydər Əliyevin anadan olmasının 88-ci ildönümü Tbilisidə qeyd edilmişdir
Tbilisi, 10 may (AZƏRTAC). Azərbaycan Respublikasının Gürcüstandakı səfirliyinin təşəbbüsü ilə ulu öndər Heydər Əliyevin anadan olmasının 88-ci ildönümü Tbilisi şəhərində qeyd edilmişdir. Azərbaycanın Gürcüstandakı səfirliyinin əməkdaşları, azərbaycanlı iş adamları, Azərbaycan və gürcü ictimaiyyətinin nümayəndələri ümummilli liderin Gürcüstan paytaxtındakı abidəsi önünə əklillər düzmüşlər. Sonra tədbir “dəyirmi masa” arxasında davam etdirilmişdir. Mərasimi Azərbaycanın Gürcüstandakı səfirliyinin məsul əməkdaşı Şövqi Mehdizadə açmış, ulu öndərin ad gününün həmişə olduğu kimi bu il də Gürcüstanda böyük ehtiramla qeyd olunduğunu bildirmişdir.
Heydər Əliyev Azərbaycan dövlətçiliyi və milli-mənəvi dəyərlər sahəsində zəngin irs yaratmış dahi şəxsiyyətdir. Heç təsadüfi deyildir ki, ulu öndər irsi araşdırıldıqca yeni-yeni səhifələr aşkarlanır, Heydər Əliyev fəaliyyətinin müəyyən vaxt anlamında deyil, çox uzaqlara tuşlanmış siyasəti özünü göstərir. Heydər Əliyevin ötən əsrin sonlarında yenidən hakimiyyətə qayıdışı ölkəni böyük təhlükələrdən xilas etməklə yanaşı, Cənubi Qafqazda sabitliyin bərpasına da şərait yaratmışdır. Təqdirəlayiq haldır ki, ulu öndərin anadan olmasının 88-ci ildönümü Gürcüstan azərbaycanlılarının yaşadıqları bütün yerlərdə keçirilmişdir. Bu, Heydər Əliyev tərəfindən əsası qoyulmuş Azərbaycan-Gürcüstan dostluq münasibətlərinin getdikcə geniş vüsət almasından xəbər verir. Ulu öndər tərəfindən irəli sürülmüş regional strateji layihələr bölgədə bəhrəsini verməkdədir və azərbaycanlılarla yanaşı, gürcülər də bu strateji layihələrin necə də uzağa istiqamətləndiyinin şahidi olur, ulu öndərimizin əvəzsiz xidmətlərini minnətdarlıqla yad edirlər. Builki tədbirlərdə nəzərə çarpan bir məqamı da qeyd etmək yerinə düşər. Gürcüstanda azərbaycanlıların ictimai təşkilatları ulu öndərin təvəllüd günü ərəfəsində daha əlaqələndirilmiş şəkildə fəaliyyət göstərmişlər. Onlar ermənilərin yalan və fitnəkarlıqlarına qarşı birgə fəaliyyət proqramı üzərində işə başlamışlar. Bu, Azərbaycanın haqq işinin gürcü ictimaiyyətinə çatdırılmasına şərait yaradacaqdır. Məlumdur ki, bölgədə separatizm təhlükəsi Azərbaycan kimi Gürcüstanı da narahat edən problemlərdəndir. Bu baxımdan Gürcüstanda fəaliyyət göstərən ictimai təşkilatlarımızın əlbir fəaliyyət göstərməsi, əminəm ki, öz nəticəsini verəcəkdir.
SOCAR-ın Gürcüstan nümayəndəliyinin məsul əməkdaşı Arif Əliyev, AZEBİ-nin icraçı direktoru Qaratel Allahverdiyeva, AZPROMO-nun rəhbəri İlqar Vəliyev və başqaları Heydər Əliyevin uzaqgörən siyasətinin hazırda Prezident İlham Əliyev tərəfindən uğurla davam etdirildiyini vurğulamışlar.
X X X
Marneuli şəhərindəki Heydər Əliyev adına Gürcüstan-Azərbaycan Tədris Universitetində ulu öndərin anadan olmasının 88-ci ildönümü münasibətilə elmi-praktiki konfrans keçirilmişdir. Konfransı universitetin rektoru, professor Novruz Bayramov açmış, iştirakçılara ümummilli liderin Qafqazda geosiyasi vəziyyətin yeniləşməsi, bölgədə sabitlik, qlobal layihələrin gerçəkləşdirilməsi və s. sahəsində əvəzsiz xidmətləri barədə ətraflı məlumat vermişdir. Professor Konstantin Ramişvili Heydər Əliyev ideyalarının həmişə yaşarlılığını diqqətə çatdırmışdır. Qeyd etmişdir ki, Heydər Əliyev iradəliliyi, cəsarəti, sözübütövlüyü ilə əksər siyasətçilərdən seçilirdi və həmişə vədinə sadiq qalan, sözünü nəyin bahasına olursa-olsun yerinə yetirən şəxsiyyət idi.
İslam Əliyev
AZƏRTAC-ın xüsusi müxbiri
Tbilisi
Bölmənin digər xəbərləri
