Ursula Fon der Lyayen: Ukrayna Avropa İttifaqına üzv olmaq yolunda irəliləyiş əldə edib
Kiyev, 4 noyabr, AZƏRTAC
Ukrayna Avropa İttifaqına üzv olmaq yolunda nəzərəçarpacaq irəliləyiş əldə edib.
AZƏRTAC xəbər verir ki, bu fikri Ukrayna Prezidenti Volodimir Zelenski ilə keçirdiyi brifinqdə Avropa Komissiyasının sədri Ursula Fon der Lyayen deyib.
“Deməliyəm ki, siz çox gözəl irəliləyiş əldə etmisiniz. Gələn həftə Komissiya genişlənmə ilə bağlı hesabatını təqdim edəndə bunu təsdiq edəcəyik”, - deyə xanım Lyayen vurğulayıb.
Fon der Lyayen qeyd edib ki, Aİ Ukraynanın müharibənin ortasında həyata keçirdiyi islahatlara heyran qalıb: “Unutmamalıyıq ki, siz öz varlığınız üçün müharibə aparırsınız. Eyni zamanda, siz ölkənizdə dərin islahatlar aparırsınız. Siz ədliyyə sistemində islahatlar aparırsınız, oliqarxların təsiri ilə mübarizə aparırsınız, çirkli pulların yuyulması ilə mübarizə aparırsınız”.
Avropa Komissiyasının sədri qeyd edib ki, Ukrayna böyük islahatları başa çatdırmaq mərhələsindədir: “Bu baş verərsə, əminəm ki, Ukrayna üzvlük prosesinin növbəti mərhələsinə keçməklə bağlı məqsədinə çatacaq”.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
