VASİLİ İSTRATOV: RUSİYA FEDERASİYASI PREZİDENTİNİN AZƏRBAYCANA İLK RƏSMİ SƏFƏRİ OLDUQCA UĞURLU KEÇMİŞDİR
“Rusiya Federasiyasının Prezidenti Dmitri Medvedevin Azərbaycana ilk rəsmi səfəri olduqca uğurlu keçmişdir”. AZƏRTAC xəbər verir ki, bunu Rusiyanın ölkəmizdəki səfiri Vasili İstratov iyulun 8-də keçirilən mətbuat konfransında bildirmişdir.
Səfir demişdir: “Tərəflər səfərin nəticələrindən böyük məmnunluq ifadə edirlər”.
Diplomat əlavə etmişdir ki, “səfər zamanı tərəflərin bütün məsələlər üzrə mövqelərinin yaxınlığı üzə çıxmış, dövlət başçıları əməkdaşlığın bir sıra yeni istiqamətlərini müəyyən etmişlər”. V.İstratov vurğulamışdır ki, prezidentlər bir-biri ilə etibarlı konstruktiv münasibətləri möhkəmləndirmişlər. Bu isə olduqca vacibdir.
V.İstratov demişdir: “Səfər zamanı imzalanan sənədlər, o cümlədən bəyannamə iki ölkə arasında münasibətlərin möhkəmlənməsinə və inkişafına yönəldilmişdir”.
Azərbaycan ilə Rusiya arasında iqtisadi sahədə münasibətlərə toxunan səfir demişdir ki, cari ilin sonunadək əmtəə mübadiləsində 2 milyardlıq həddi keçmək üçün əsas vardır. Lakin bunun üçün sərmayə layihələrimiz çatışmır.
V.İstratov jurnalistlərin suallarına cavab verərək iki ölkə arasında mehriban qonşuluq və dostluq münasibətlərini, ATƏT-in Minsk qrupunun həmsədri kimi Rusiyanın Dağlıq Qarabağ münaqişəsinin nizama salınmasında konstruktiv rolunu diqqətə çatdırmışdır.
Bölmənin digər xəbərləri
