VAŞİNQTONDA 36-CI İPƏK YOLU FESTİVALI
Çindən Venesiyaya 15 dəqiqəyə. 36-cı İpək Yolu festivalının minlərlə tamaşaçısı Avropa və Asıyanı birləşdirən qədim tarixi marşrutu məhz bu qədər vaxta qət edə bilirdilər. Bunun üçün, sadəcə, Vaşinqtonun Milli meydanına gəlib Kapitolidən Corc Vaşinqtonun monumentinədək addımlamaq lazım idi. İyunun 26-dan iyulun 7-dək keçirilən İpək Yolu festivalı 36 illik tarixində ən möhtəşəmi idi. Onun təşkilatçısı - Vaşinqtondakı Smitsonian Folklor və Mədəni İrs Mərkəzi İpək yolu ölkələrini amerikalılara daha da yaxından tanıtmaq istəyirdi. Festivalın builki mövzusu isə belə idi: Mədəniyyətləri birləşdirən, qarşılıqlı etimad yaradan İpək Yolu.
On gün ərzində Vaşinqtonun Milli meydanı əsl Şərq bazarını xatırladırdı. Burada əllə toxunmuş xalçalardan tutmuş müxtəlif xalqların mətbəxlərinədək hər şeylə tanış olmaq mümkün idi. Hətta Vaşinqtonun havası da, sanki, festivala gələnlərdə İpək yolu ölkələri haqqında tam təsəvvür yaratmaq istəyirdi - belə ki, hava lap Mərkəzi Asiyadakı kimi bürkülü idi. Lakin bu, Amerikanın hər yerindən axışıb gələn 60 min tamaşaçının festivala marağını heç də azaltmırdı. Bərk ayaqda meydanın ortasında yerləşən tibb məntəqəsindən yardım almaq və yaxud kölgəyə çəkilib şərqlilər sayağı soyuq qarpız yemək olardı.
Azərbaycan musiqiçilərinin ifasını dinləyən iki amerikalı tamaşaçı AZƏRTAC-ın müxbiri ilə söhbətdə heyrətlərini gizlədə bilmirdilər: “Valehedici musiqiniz var. İpək yolu festivalına gəlməklə biz təkcə mədəniyyət və müxtəlif folklor haqqında biliyimizi deyil, həm də coğrafiyaya dair biliyimizi də artırırıq. İnana bilməzdik ki, on il bundan əvvəl heç adlarını belə eşitmədiyimiz bölgələrin incəsənət xadimləri burada müstəqil dövlətləri təmsil edəcəklər”.
Tar və kamança sədaları ilə sehrlənən amerikalılar muğam sənətinin nümunələrini məmnuniyyətlə dinləyir, həmyerlilərimizi hər dəfə “Azərbaycan, Azərbaycan!” nidaları ilə səhnədən yola salırdılar. Azərbaycan musiqiçilərinə əməkdar incəsənət xadimi, ustad sənətkar Ədalət Nəsibov başçılıq edirdi. Elçin Həşimov, Elnur Əhmədov, Aydın Əliyev, Niyaməddin Babayev və Leyla Rəhimova on günlük festivalda təkcə Amerika tamaşaçısı ilə deyil, həmçinin digər ölkələrin sənətçiləri ilə təmas qururdular. Hərdən konsertlər müxtəlif folklorların simbiozuna çevrilirdi - azərbaycanlılar çalır, özbəklər və taciklər isə rəqs edirdilər.
Festivalın Azərbaycan üzrə əlaqələndiricisi, mədəniyyətimizin çoxdankı vurğunu olan Cefri Verbok müxbirinizə hazırlıq prosesindən danışdı. Onun sözlərinə görə, iştirakçıların məhz uşaqlar arasından seçilməsində o, özü təkid etmişdir: “Mən istəyirdim ki, amerikalılar Azərbaycanın gənc nəslinin folkloru necə sevdiklərini və onu nəsildən-nəsilə yaşatdıqlarını görsünlər”.
14 yaşlı Niyaməddin və 13 yaşlı Leyla festivalda ən çox sevinənlərdən idilər. “Bayatı-Şiraz” və “Qatar” təsniflərinin həzin ifası ilə onlar Amerika tamaşaçısının qəlbinə ilk gündən yol tapa bildilər. Vaşinqtonda ifa etdiyiniz ən sevimli musiqi nömrəsi hansı idi? sualına isə “Qarabağ şikəstəsi” deyə cavab verdilər. Tarçalan Elçin Haşımovun dediyinə görə, “Qarabağ şikəstəsi”nə Ermənistandan gələnlər də qulaq asıbmış və hətta onları alqışlamışdılar.
İpək yolu festivalında uğurlu çıxışlarına görə, Azərbaycan nümayəndə heyətinin üzvlərinə ölkəmizin Vaşinqtondakı səfirliyi tərəfindən tərifnamələr təqdim edildi. “Biz on ildə gördüyümüz işi siz, incəsənət ustaları bəzən on günə görə bilirsiniz” - deyən səfir Hafiz Paşayev təşəkkürünü bildirdi. Onların şərəfinə verilən ziyafət isə əsl Azərbaycan bayramına çevrildi. Ziyafətdə Azərbaycan diasporunun nümayəndələri də iştirak edirdilər.
Şəfəq Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
