VƏTƏNDAŞLARIN ƏRİZƏ VƏ ŞİKAYƏTLƏRİNDƏ TOXUNULAN MƏSƏLƏLƏR HƏLLİNİ TAPMIŞDIR
Daxili işlər naziri, general-polkovnik Ramil Usubov AZƏRTAC-a bildirmişdir ki, 2005-ci ildə vətəndaşların qəbulu və onların müraciətlərinə baxılması işinə ciddi diqqət yetirilmişdir. Belə ki, hesabat dövründə nazirliyə daxil olan müraciətlər 30,7 faiz artaraq 25 min 728 olmuşdur. Lakin təhlil göstərir ki, onlardan 1606-ı təkrar, 5382-i eyni məzmunda olmuş, 1145 müraciətdə qaldırılan məsələlər nazirliyin səlahiyyətinə aid olmadığından aidiyyəti üzrə göndərilmişdir. Müraciətlərin yalnız 1518-ni və ya 5,9 faizini polis əməkdaşlarından olan şikayətlər təşkil etmişdir ki, bu da 2004-cü illə müqayisədə 2 faiz azdır.
Nazirliyin rəhbərliyi tərəfindən mərkəzi aparatda, habelə 19 şəhər və rayonu əhatə edən iki regionda 301 vətəndaş qəbul edilmişdir. Bütün ərizə və şikayətlər xüsusi nəzarətə götürülərək böyük əksəriyyəti müsbət həll olunmuş, vətəndaşlara yazılı cavabların verilməsi təmin edilmişdir.
