ELM VƏ TƏHSİL
“Vikipediya”nın Azərbaycan dili bölməsində keyfiyyət 42-yə yüksəlib
Bakı, 7 noyabr, AZƏRTAC
“Vikipediya”nın Azərbaycan dili bölməsində dərinlik (keyfiyyət) 41-dən 42-yə yüksəlib. Bu gün “Vikipediya”nın Azərbaycan dili bölməsində keyfiyyətli, məzmunlu, istinadlarla zəngin məqalələr yaradılır və zənginləşdirilir.
Bunu AZƏRTAC-a açıqlamasında AMEA-nın Rəyasət Heyəti Aparatının “Elektron Akademiya” şöbəsinin baş mütəxəssisi, “Vikipediya” üzrə mütəxəssis, diaspor üzrə araşdırmaçı-ekspert Elnur Eltürk deyib. O bildirib ki, bu işdə inzibatçıların, könüllülərin əməyi çox böyükdür. Onların fədakarlığı sayəsində bu işlər həyata keçirilir. Digər tərəfdən, Azərbaycan dili bölməsinin addım-addım irəliləməsi və digər dil bölmələrində öz mövqeyini gücləndirməsi hər bir “Vikipediya” könüllüsünə qürur hissi yaşadır. Çünki bu onların zəhmətinin bəhrəsidir.
“Son aylar AMEA-nın Rəyasət Heyəti Aparatının “Elektron Akademiya” şöbəsinin təşkilatçılığı ilə Mərkəzi Elmi Kitabxanada akademiyanın müxtəlif institutlarının əməkdaşları üçün “Vikipediya” təlimləri keçirilir. Onlarla əməkdaş könüllü sürətdə təlimlərdə iştirak edir. Sevindirici hal odur ki, AMEA Nizami Gəncəvi adına Ədəbiyyat İnstitutunun könüllü “Vikipediya” qrupu formalaşdırılıb. Burada əsas məqsəd Azərbaycan ədəbi-tarixi prosesinin, görkəmli şəxsiyyətlərin həyat və fəaliyyətinin elmi-akademik şəkildə “Vikipediya”da geniş şəkildə öz əksini tapmasını təmin etməkdir. Bir neçə aydır ki, komanda bunun peşəkar səviyyədə həyata keçirir”, - deyə E.Eltürk qeyd edib.