MƏDƏNİYYƏT
Vyanada “Azərbaycan: Nar məkanı” adlı təntənəli bayram tədbiri keçirilmişdir
Vyana, 16 noyabr (AZƏRTAC). Noyabrın 16-da Vyananın mərkəzində yerləşən Mixaelerplatz meydanında “Azərbaycan: Nar məkanı” (“Aserbaidschan: Terra granata”) adlı bayram tədbiri keçirilmişdir. Azərbaycan Respublikasının Mədəniyyət və Turizm Nazirliyi, ölkəmizin Avstriyadakı səfirliyi və Vyana şəhər meriyasının birgə təşkil etdiyi tədbir Azərbaycanın dövlət müstəqilliyinin bərpa olunmasının 20 illiyi münasibətilə və 2011-ci ilin respublikamızda “Turizm ili” elan edilməsi ilə əlaqədar keçirilmişlər.
Tədbirin açılışında mədəniyyət nazirinin müavini Sevda Məmmədəliyeva çıxış edərək, tədbirə gələn çoxsaylı Vyana sakinlərini salamlamışdır. Narın gənclik, gözəllik, sağlamlıq və müdriklik rəmzi kimi dəyərləndirildiyini diqqətə çatdıran S.Məmmədəliyeva bu meyvənin Azərbaycanın rəmzlərindən biri olduğunu bildirmişdir. Qeyd edilmişdir ki, dünyada mövcud olan 60-dan artıq nar sortunun hamısı bərəkətli Azərbaycan torpağında yetişir. Nar mövzusu eyni zamanda qədim zamanlardan Azərbaycan xalqının milli-bədii təfəkkürünə hoparaq, onun mədəniyyətində - folklor-söz yaradıcılığında, tətbiqi sənətdə, rəssamlıqda, poeziyada əksini tapmışdır. Azərbaycan xalçalarında, orta əsrə aid miniatürlərdə, metal və ağac məmulatlarında nar motivlərinə rast gəlmək mümkündür. Şəninə mahnılar və şeirlər qoşulan, əfsanələr söylənən bu “cənnət meyvəsi” ta qədim zamanlardan Azərbaycan xalqının maddi mənəvi mirasının ən dəyərli obrazlarından birinə çevrilmişdir.
Azərbaycan və Avstriya arasında mədəni əlaqələrin yüksək səviyyədə inkişaf etdiyini diqqətə çatdıran S.Məmmədəliyeva bildirmişdir ki, Vyanada dahi Azərbaycan bəstəkarı Üzeyir Hacıbəylinin abidəsi ucaldılmış, bir qədər əvvəl isə Bakıda Azərbaycan Prezidenti İlham Əliyev və Avstriyanın Federal Prezidenti Haynts Fişerin iştirakı ilə Avstriyanın məşhur bəstəkarı Volfqanq Amadey Motsartın abidəsini açılışı olmuşdur.
Tədbir iştirakçılarını narın möcüzəli vətəni Azərbaycandan gətirilmiş nar şirəsi və Azərbaycan mətbəxinin nar istifadə olunmaqla hazırlanan təamlarından dadmağa dəvət edən S.Məmmədəliyeva “əlahəzrət nar”ın pişvazına çıxanlara” təşəkkürünü bildirmişdir.
Sonra Vyana şəhər meriyasının xarici əlaqələr şöbəsinin rəhbəri Andreas Launer və Azərbaycanın Avstriyadakı səfiri Qalib İsrafilov çıxış etmişlər. Natiqlər belə tədbirlərin hər iki ölkə arasında əlaqələrin daha da dərinləşməsinə, mədəniyyətlərarası dialoqun inkişafına böyük töhfə verəcəyini vurğulamışlar. Qeyd edilmişdir ki, mövcud potensial bu cür tədbirlərin daha tez-tez keçirilməsinə geniş imkan yaradır.
Bayramın bədii hissəsində Azərbaycan Dövlət Pantomima Teatrının baş rejissoru, Əməkdar İncəsənət Xadimi Bəxtiyar Xanızadənin rejissorluğu ilə hazırlanmış “Məlikəhmədin nağılı” tamaşası nümayiş etdirilmişdir. “Məlikməmmədin nağılı”nın motivləri əsasında hazırlanmış tamaşada Padşah (Elman Rəfiyev) müdriklik rəmzi olan narı qorumağı övladlarına həvalə edir, onun kiçik oğlu Məlikəhməd (Elnur İsmayılov) isə Divlə (Bəhruz Vaqifoğlu) gərgin mübarizədən sonra qələbə qazanaraq, yetişmiş nar meyvəsini və bununla da atasının səltənətində hökm sürən müdrikliyi xilas edir.
Bakı Xoreoqrafiya Məktəbinin şagirdləri “Sarı gəlin”, “Naz eləmə”, “Qaytağı”, “Yallı”, “Uzundərə” rəqslərini məharətlə ifa etmişlər. Azərbaycan milli musiqisindən təsirlənən şəhər sakinləri və meydana toplaşan həmvətənlərimiz, eləcə də şəhərin rəsmi təmsilçiləri musiqi sədaları altında Azərbaycan rəqqasları ilə birlikdə meydan boyu yallı getmişlər. Lökbatandakı 9 nömrəli musiqi məktəbinin şagirdlərinin nağara və zərb alətlərində ifa etdikləri Azərbaycan ritmləri də tədbir iştirakçılarını valeh etmişdir. “Emil Əfrasiyab və dostları” qrupu bayram tədbirində musiqi proqramı ilə çıxış etmişdir. Ənvər Sadıqovun qarmonda, Hüseyn Hüseynovun zurna və klarnetdə misilsiz ifası tamaşaçılar tərəfindən sürəkli alqışlarla qarşılanmışdır.
Tədbirdə nar mövzusuna həsr edilmiş Azərbaycanın xalq və dekorativ tətbiqi sənət nümunələrindən ibarət sərgi nümayiş olunmuşdur. Bu məqsədlə quraşdırılmış çadırlarda “Azərxalça” Elmi-Yaradıcılıq İstehsalat Birliyinin məhsulu olan xalçalar sərgilənmiş, misgərlik və dulusçuluq məmulatları, şəbəkə sənəti nümunələri nümayiş etdirilmişdir.
Qeyd edək ki, Vyanada keçirilmiş nar bayramı Azərbaycan Respublikasının Mədəniyyət və Turizm Nazirliyi ilə Avstriyanın Təhsil, İncəsənət və Mədəniyyət üzrə Federal Nazirliyi arasında 2009-2012-ci illər üzrə əməkdaşlıq haqqında Anlaşma Memorandumuna müvafiq olaraq mədəniyyət mübadiləsinin genişləndirilməsinə xidmət edir. Bayram tədbirində ATƏT-in təmsilçiləri, Vyanada akkreditə olunmuş diplomatik korpusun, Avstriya hökumətinin nümayəndələri, Qazaxıstan Respublikası turizm nazirinin müavini, Avstriya-Azərbaycan Ticarət Palatasının əməkdaşları, Vyana ictimaiyyətinin nümayəndələri, ziyalılar, bu ölkədə yaşayan soydaşlarımız iştirak etmiş, Vyanaya gələn turistlər bu qeyri-adi hadisəni heyranlıqla seyr etmişlər.
Tədbirə gələnlər “AZ-Granata” şirkətinin istehsalı olan nar məhsulları, “Gilan” holdinqin “Jalə” şirələri, şərablar və Azərbaycan mətbəxinin nardan hazırlanmış nümunələrinə qonaq edilmişlər. Tədbir iştirakçılarına üzərində nar motivləri olan ipək kəlağayılar hədiyyə edilmiş, Azərbaycan haqqında çap məhsulları, Mədəniyyət və Turizm Nazirliyinin hədiyyə paketləri paylanmışdır. Meydanda quraşdırılmış ekranlarda konsert boyu Azərbaycana həsr olunmuş videoçarxlar və narın görüntüləri nümayiş etdirilmişdir.
Elgün Niftəliyev
AZƏRTAC-ın xüsusi müxbiri
Vyana