Mərakeşli nazir: Azərbaycanla əlaqələrin inkişafında geniş potensial var
Bakı, 29 may, AZƏRTAC
Rabat şəhərində Azərbaycanın Mərakeşdəki səfirliyinin təşkilatçılığı ilə 28 May - Müstəqillik Günü münasibətilə rəsmi ziyafət təşkil edilib.
Səfirlikdən AZƏRTAC-a bildirilib ki, tədbirdə çıxış edən səfir Nazim Səmədov 1918-ci il mayın 28-də Azərbaycan Xalq Cümhuriyyətinin elan edilməsi ilə Şərqdə ilk dünyəvi, parlamentli respublikanın təsis olunduğunu, çoxpartiyalı sistemin və azad medianın fəaliyyət göstərdiyini, Şərq aləmində ilk olaraq qadınlara səsvermə hüquqlarının verilməsi ilə mütərəqqi dövlətin əsasının qoyulduğunu deyib. Azərbaycanla Mərakeş arasında yüksələn xətlə inkişaf edən ikitərəfli münasibətlərə toxunan səfir bu il Azərbaycan xalqının Ulu Öndəri Heydər Əliyevin 1994-cü ildə Kasablankaya səfərinin 30-cü ildönümünün qeyd edildiyini bildirib və bu səfərin ölkələr arasında əlaqələrin təməlini qoyduğunu vurğulayıb.
Diplomat cari ilin noyabrında ölkəmizdə təşkil ediləcək COP29 kimi mötəbər beynəlxalq tədbir barədə məlumat verib, habelə Şuşa şəhərinin bu il İslam dünyasının Mədəniyyət paytaxtı elan edildiyi vurğulayıb.
Tədbirdə çıxış edən Mərakeş Krallığının sənaye və ticarət naziri Ryad Mezzur eyni dəyər və ənənələri bölüşən Azərbaycanla Mərakeş arasındakı münasibətlərin möhkəm təmələ söykəndiyini bildirib və əlaqələrin möhkəmləndirilməsində hər iki ölkənin ali rəhbərləri arasında mövcud dostluq münasibətlərinin mühüm rol oynadığını vurğulayıb. O, ötən ilin noyabrında Rabatda keçirilmiş Azərbaycan-Mərakeş Birgə Hökumətlərarası Komissiyanın 2-ci toplantısının və ilk biznes forumun ikitərəfli əlaqələrin inkişafına mühüm töhfə verdiyini xüsusi qeyd edib. Bununla yanaşı, bir neçə gün öncə iki ölkənin xarici işlər nazirləri tərəfindən imzalanmış ümumvətəndaş pasportlarına malik olanlar üçün viza tələbinin aradan qaldırılmasına dair sazişin xüsusilə turizmin inkişafında əhəmiyyətli olacağına diqqət çəkib. Nazir, həmçinin iqtisadi, sosial və mədəni əlaqələrin daha da inkişaf etdirilməsi üçün geniş potensialın olduğunu bildirib və hər iki ölkənin əlverişli coğrafi mövqeyini nəzərə alaraq, investisiyaların təşviqi və biznes əlaqələrinin gücləndirilməsinə dair çağırış edib.
Ziyafət çərçivəsində, həmçinin Azərbaycanın Mədəniyyət Nazirliyinin dəstəyi ilə ötən ilin oktyabrında ölkəmizə səfər etmiş mərakeşli məşhur fotoqraf Mohammed Tazinin Azərbaycanın zəngin təbiəti, mədəniyyəti və tarixini əks etdirən fotosərgisinin təqdimatı da baş tutub. Bununla yanaşı, Mərakeşdə səfərdə olan Beynəlxalq Muğam Mərkəzinin direktoru, Azərbaycanın Əməkdar artisti Sahib Paşazadə və gənc pianoçu, beynəlxalq mükafatlar laureatı Firuzə Bəylərovanın ifasında məşhur Azərbaycan, eləcə də dünya bəstəkarlarının əsərləri səsləndirilib. Həmçinin ölkəmizin turizm potensialı ilə bağlı videoçarxlar nümayiş etdirilib, milli mətbəximizin nümunələri təqdim olunub.
Bölmənin digər xəbərləri
