VYANADA POLİS MƏNTƏQƏSİNİN YAXINLIĞINDA ÇƏTƏNƏ KOLLARI AŞKAR EDİLMİŞDİR
Üç işgüzar avstriyalı zirzəmidə çətənə əkməklə yanaşı, kolların sıx bitməsi üçün buranı süni surətdə işıqlandırmışlar. Onlar hər iki aydan bir bol məhsul toplayır, zirzəmi üçün ayda 600 avro icarə haqqı ödəyirdilər.
Avstriya DİN-in “Veqa” xüsusi təyinatlı bölmələri “xeyirxahların” xəbərdarlığından sonra zirzəmiyə qəfil hücum edərək, burada 700 min avro dəyərində çətənə aşkarlamışlar.
Maraqlıdır ki, həbs edilmiş “aqronomlar” artıq istintaq altında idilər, çünki onlar Noyzidlerzeye gölü rayonunda da böyük çətənə plantasiyası salmışdılar.
İndi bu işbazları residivist kimi yeni mühakimə və daha ağır cəza gözləyir.
