Xaçmaz rayonunda qəsdən adam öldürməyə cəhd göstərən şəxslə bağlı cinayət işi başlanıb
Bakı, 7 avqust, AZƏRTAC
Avqustun 6-sı saat 02 radələrində Xaçmaz rayonunun Qusarçay kənd sakini Sahib Cəbrayılovun çoxsaylı xəsarətlər alması barədə rayon prokurorluğuna məlumat verilib.
Xaçmaz Rayon Prokurorluğunun AZƏRTAC-a daxil olan məlumatında bildirilib ki, aparılmış araşdırmalarla zərərçəkmişin həmkəndlisi Nizami Baxışovun kənd ərazisində yerləşən yanacaqdoldurma məntəqəsinin ərazisində şəxsi münasibətlər zəminində aralarında yaranmış mübahisə zamanı Sahib Cəbrayılova çoxsaylı bıçaq xəsarətləri yetirərək sonuncunu qəsdən öldürməyə cəhd etdiyi müəyyənləşdirilib.
Faktla bağlı Xaçmaz Rayon Prokurorluğunda Cinayət Məcəlləsinin 29, 120.1-ci (qəsdən adam öldürməyə cəhd) maddəsi ilə cinayət işi başlanıb.
Nizami Baxışov şübhəli şəxs qismində tutularaq istintaqa cəlb olunub.
Hazırda istintaq davam edir.
Bölmənin digər xəbərləri
