Xalq artisti: Qraf Qloster obrazı həm mənəvi, həm də fiziki iztirabın təcəssümüdür
Bakı, 12 may, AZƏRTAC
“Kral Lir” tamaşasında Qraf Qloster obrazını canlandırdım. Bu, kifayət qədər mürəkkəb və dərin psixoloji çalarları olan obrazdır. Qlosterin faciəsi ikiqatdır - həm mənəvi, həm də fiziki iztirab yaşayır. Obrazın gözlərinin çıxarılması onun taleyinin ən ağır və sarsıdıcı məqamlarından biridir.
Bunu AZƏRTAC-a açıqlamasında Xalq artisti Sabir Məmmədov deyib. O diqqətə çatdırıb ki, oynadığı rolun aktyor üçün həm müsbət, həm də mənfi tərəfləri var. “Müsbət cəhəti ondadır ki, obraz yüksək aktyorluq ustalığı, güclü emosional ifadə və peşəkarlıq tələb edir. Mənfi tərəfi isə obrazın çox mürəkkəb olması, daxili dünyasının və faciəsinin tamaşaçıya dolğun şəkildə çatdırılmasının çətinliyidir.
Məşq prosesi çox maraqlı keçdi və mənim üçün dəyərli təcrübə oldu. Həm aktyor, həm də rejissor baxımından qarşılıqlı şəkildə təcrübələrimizi bölüşmək bu yaradıcılıq prosesini daha da zənginləşdirdi”, - deyə S.Məmmədov əlavə edib.
Müxbir - Fidan Əlizadə
Bölmənin digər xəbərləri
