İQTİSADİYYAT
XALQ YENİ NEFT STRATEGİYASINI BƏYƏNİR VƏ DƏSTƏKLƏYİR
AZƏRTAC-ın müxbiri xəbər verir ki, açıq diskussiya şəraitində keçən görüş iştirakçılara öz fikirlərini birbaşa söyləmək imkanı vermişdir. Texnika elmləri doktoru Eldar Şahbazovun, siyasi elmlər doktoru Rövşən Mustafayevin, akademik Məmmədtağı Cəfərovun, Milli Məclisin deputatları Nizami Əhmədovun və Vaqif Abdullayevin məruzələri dinlənildikdən sonra açıq dialoq keçirilmişdir. Görüşün iştirakçıları Azərbaycanın yeni neft strategiyasının işlənib hazırlanmasını və uğurla həyata keçirilməsini Heydər Əliyevin adı ilə bağlayaraq qeyd etmişlər ki, 1994-cü ildən başlayaraq, dünyanın aparıcı neft şirkətləri ilə bağlanan müqavilələr bu gün öz bəhrəsini verir. Ölkəmizdə neft strategiyasının düzgün qurulması nəticəsində keçmiş SSRİ məkanında Azərbaycan yeganə respublikadır ki, bütün sahələrdə böyük sıçrayışlara nail olmuşdur. Görüşdə siyasi memarı və yaradıcısı möhtərəm Prezidentimiz Heydər Əliyev olan neft strategiyasının həyata keçirilməsində və onun reallaşdırılması üçün çox mühüm addımlar atılmasında ARDNŞ-in birinci vitse-prezidenti cənab İlham Əliyevin xüsusi xidmətləri olduğu qeyd edilmişdir. Bildirilmişdir ki, bu gün Azərbaycan xalqı xoşbəxtdir ki, Heydər Əliyevin İlham Əliyev kimi layiqli davamçısı vardır. Dünyanın tanınmış liderləri ilə onun görüşləri, apardığı səmərəli müzakirələr Azərbaycanın beynəlxalq miqyasda nüfuzunun artmasına səbəb olur.
Bu yaxınlarda İlham Əliyevin respublikamızın Baş naziri təyin edilməsi isə xalqımızın ürəyindən xəbər vermişdir. Hamı yaxşı başa düşür ki, Azərbaycanın gələcək taleyi etibarlı əllərdədir.
Görüşdə “Azərbaycanın neft strategiyası” sənədli filmi gəncəlilərə hədiyyə edilmişdir.
Film yerli “Kəpəz” televiziya kanalı ilə nümayiş etdiriləcəkdir.