XARİCİ İŞLƏR NAZİRİ ELMAR MƏMMƏDYAROVUN ÇIXIŞI
Hörmətli görüş iştirakçıları!
Müstəqil Azərbaycanın xarici siyasətinin əsas istiqamətləri və prinsipləri ümummilli liderimiz Heydər Əliyev tərəfindən müəyyən olunmuşdur. İndiki mərhələdə qarşımızda duran yeni vəzifələr bu prinsiplərin əsasında ardıcıl işin aparılmasını və konkret addımların atılmasını tələb edir.
Hələ keçən il Prezident Heydər Əliyevin iştirakı ilə belə görüşün keçirilməsi nəzərdə tutulmuşdu. Amma əfsuslar olsun ki, onun səhhəti buna imkan vermədi.
2001-ci il iyunun 8-də qəbul olunmuş “Diplomatik xidmət haqqında” Azərbaycan Respublikasının Qanunu Xarici İşlər Nazirliyinin fəaliyyətinin tənzimlənməsinə və Azərbaycan Respublikasının Prezidenti cənab İlham Əliyev tərəfindən müəyyən edilən xarici siyasətin həyata keçirilməsinə geniş imkanlar yaradır. Azərbaycanın diplomatik xidmətinin indiki vəziyyətini aşağıdakı rəqəmlərlə təsvir etmək olar.
Azərbaycan 156 ölkə ilə diplomatik əlaqələr qurmuşdur. Azərbaycanda 63 səfirlik akkreditə olunmuşdur. Bakıda iqamətgahı olan 26 səfirlik və 16 beynəlxalq təşkilatın nümayəndəliyi fəaliyyət göstərir. Azərbaycanın xaricdə 21 səfirliyi, 5 daimi nümayəndəliyi, iki baş konsulluğu və iki fəxri konsulluğu fəaliyyət göstərir. Yaxın zamanda Bolqarıstan, Belarus, İndoneziya, Küveyt, Kanada, Latviya, Hindistan, Macarıstan, Yaponiya və Yunanıstanda səfirliklərin açılması planlaşdırılır. Azərbaycan 44 beynəlxalq və regional təşkilatın üzvüdür. Bu təşkilatlarda 22 azərbaycanlı çalışır. Azərbaycan 250 çoxtərəfli beynəlxalq müqavilələrə qoşulmuşdur.
Azərbaycanın diplomatik nümayəndəlikləri ölkənin xarici siyasətini həyata keçirən qurumlardır və onların işində səmərəliliyin artırılması bu gün ən mühüm məsələlərdən biridir. Buna nail olmaq üçün onların işində təşəbbüskarlıq gücləndirilməli, fəallıq və məsuliyyət artırılmalıdır. Müasir dövrdə Azərbaycanın diplomatik xidmətinin əsas vəzifələri sırasında aşağıdakı məsələlər durur.
İlk növbədə, Ermənistanla Azərbaycan arasındakı münaqişənin ədalətli həll olunması istiqamətində diplomatik nümayəndəliklərin müvafiq işi gücləndirilməlidir. Ermənistanın Azərbaycan xalqı haqqında mənfi təəssürat yaratmaq istiqamətində apardığı təbliğatla davamlı mübarizə diplomatik nümayəndəliklərimizin əsas vəzifələrindən biri olmalıdır. Müasir informasiya texnologiyasından istifadə edərək, Azərbaycanda və xaricdə informasiya və təbliğat işi gücləndirilməlidir. Qaçqın və məcburi köçkünlərimizə humanitar yardımların davam etdirilməsi istiqamətində fəaliyyət göstərilməlidir. Xaricdəki nümayəndəliklərimiz yerləşdikləri ölkələrin kütləvi informasiya vasitələrində Azərbaycan haqqında yayılan məlumatları diqqətlə izləyib təhlil etməli və Xarici İşlər Nazirliyinə vaxtında məlumat verməli, eyni zamanda, o məlumatlara yerlərdə rəy bildirməlidirlər.
Diplomatik nümayəndəliklərin işində iqtisadi məsələlər də mühüm yer tutmalıdır. Azərbaycanın iqtisadi inkişafı, sərmayə qoyuluşu haqqında məlumat hazırlanmalı və müvafiq təşkilati işlər aparılmalıdır. Xaricdə yaşayan Azərbaycan diasporu ilə iş gücləndirilməlidir. Onlarla əlaqələrin genişlənməsi sahəsində iş davam etdirilməlidir. Azərbaycanın xaricdəki hüquqi və fiziki şəxslərinin hüquqları və maraqlarının qorunması vacib məsələdir. Bununla bağlı xaricdə yaşayan Azərbaycan vətəndaşlarının pasport, viza və digər konsul məsələlərinə daim diqqət göstərilməlidir. Azərbaycanın digər dövlət qurumları ilə, eləcə də müstəqil tədqiqat təşkilatları ilə əməkdaşlıqda Xarici İşlər Nazirliyində analitik işin gücləndirilməsi təmin edilməlidir.
Xarici İşlər Nazirliyi ölkəmizin xarici siyasətinə birbaşa təsir edən xarici siyasət, milli təhlükəsizlik və hərbi konsepsiyalar kimi mühüm konseptual sənədlərin işlənib hazırlanmasında aparıcı rol oynamağa hazırdır. Xarici İşlər Nazirliyi Milli Məclislə gündəlik əməkdaşlığın, eləcə də beynəlxalq parlamentlərarası əməkdaşlığın inkişafında iştirak etməlidir. Qloballaşma şəraitində xaricdə Azərbaycanın maraqlarını təmin etmək üçün Xarici İşlər Nazirliyinin əlaqələndirici rolu faktiki işlə təmin olunmalıdır.
Bir sıra məsələlərlə yanaşı, bu məqsədlə Xarici İşlər Nazirliyi ölkəmizin xarici siyasətinin prioritet məsələlərinə dair rəsmi mövqeləri əks etdirən sənədləri hazırlayıb Azərbaycanın digər dövlət qurumlarına təhvil verir.
Nazirliyin daxili strukturu təkmilləşdirilməli və ölkəmizin xarici siyasət prioritetlərinə uyğunlaşdırılmalıdır. Bununla bağlı nazirliyin bəzi idarələri və şöbələri ləğv olunacaq, bəziləri isə yenidən qurulacaqdır. Avropa qurumlarına inteqrasiya məsələləri, arxiv məsələləri üzrə bölmələr, təlim mərkəzi və digər struktur bölmələri təsis olunacaqdır. Nazirliyin kollegiyası yaradılmalıdır. Bununla bağlı təkliflər artıq Nazirlər Kabinetinə göndərilmişdir.
Yerli və xarici kütləvi informasiya vasitələri ilə iş gücləndirilməlidir. Keçirilmiş tədbirlər, baş vermiş hadisələr və xarici siyasətin ayrı-ayrı məsələlərinə dair dövlətimizin mövqeyi haqqında müəyyən olunmuş qaydada mətbuat nümayəndələri üçün brifinq keçirilməlidir. İnternet vasitəsilə təbliğat və məlumat işi genişləndirilməlidir.
Diplomatik xidmət ən layiqli və müasir tələblərə cavab verən kadrlarla təmin olunmalıdır. Xarici İşlər Nazirliyi bu istiqamətdə müəyyən iş aparır. Kadr siyasətində şəffaflıq, aşkarlıq, obyektivlik, peşəkarlıq, operativlik, kadrların seçilməsində aydın prinsiplərin müəyyən olunması, Xarici İşlər Nazirliyinə işə qəbul edilmədə və diplomatik nümayəndəliklərə ezam olunmada test sistemlərinin işlənib hazırlanması və tətbiqi, rotasiya prinsipi və sair təmin edilməlidir.
Çıxışıma yekun vuraraq demək istəyirəm ki, Azərbaycanın diplomatik xidməti müstəqilliyimizin bərpasından sonrakı dövrdə yeni şəraitdə formalaşmışdır. Diplomatik xidmət orqanlarının qarşısında duran vəzifələrin yerinə yetirilməsi sahəsində hələ çox iş görülməlidir. Yuxarıda göstərdiyim məsələlər onların yalnız bir hissəsini təşkil edir.
Cənab Prezident, Sizi əmin etmək istəyirəm ki, Azərbaycanın diplomatik xidmət orqanlarının bütün əməkdaşları Sizin tərəfinizdən onlara tapşırılan məsələlərin yerinə yetirilməsində öz səylərini əsirgəməyəcəklər.
X X X
Azərbaycan Prezidenti İlham Əliyev görüşdə geniş nitq söylədi.
Bölmənin digər xəbərləri
