XARİCİ MƏTBUAT SƏHİFƏLƏRİNDƏ GÖRKƏMLİ AZƏRBAYCAN RƏSSAMININ TƏBRİZDƏ SƏRGİSİ AÇILMIŞDIR
Təbrizdə çıxan “Məhdi Azadi” qəzeti bu başlıq altında dərc etdiyi məqalədə Azərbaycanın xalq rəssamı Cəmil Müfidzadənin İran İslam Respublikasında fərdi sərgisi haqqında öz oxucularına ətraflı məlumat vermişdir. Qəzet yazır ki, Təbriz mədəniyyət şöbəsinin “Nigarxanə” adlı xüsusi sərgi salonunda rəssamın boyakarlıq janrında çəkdiyi 60 tablosu nümayiş etdirilir. Rəssamın yaradıcılıq təxəyyülünün məhsulu olan bu əsərlərin mövzu dairəsindən, əhatə etdiyi ölkələrdən söz açılır, xalq rəssamının Təbrizdə təşkil olunan ikinci fərdi sərgisi olduğu bildirilir. “Misaq” qəzeti də Azərbaycan rəssamının sərgisi haqqında yazı dərc etmişdir. Bu sərgi ilə bağlı mətbuatda verilən yazılarda qonşu və dost ölkənin tanınmış ictimai xadimləri, İran parlamentinin üzvləri Azərbaycan Respublikasının Prezidenti Heydər Əliyevin İran İslam Respublikasına səfərindən sonra iki dövlət arasında əməkdaşlığın, xüsusilə mədəniyyət sahəsində əlaqələrin genişləndiyini vurğulayır, İİR-in Prezidenti Məhəmməd Xatəminin ölkəmizə qarşıdakı rəsmi səfərinin qarşılıqlı surətdə faydalı əməkdaşlığın genişlənməsi üçün yeni perspektivlər açacağını bildirmişlər. X X X Rəssam Cəmil Müfidzadə Təbrizdə uğurla keçən fərdi sərgisi başa çatdıqdan sonra Bakıya qayıtmışdır. O, AZƏRTAC-ın müxbiri ilə söhbətində demişdir: Təbrizdə məni məhrəmanə, səmimi, dost kimi qarşıladılar, mənə yüksək qonaqpərvərlik göstərdilər. Qonşu ölkədə fərdi sərgini keçirməyə məni Təbriz mədəniyyət mərkəzinin müdiri Mustafa Quluzadə dəvət etmişdi. Oraya Azərbaycan, İran, Türkiyə, Rusiya, Fransa, Yaponiyanın həyatından və təbiətindən bəhs edən boyakarlıq janrında çəkilmiş 60-a qədər tablo aparmışdım. Sərginin açılışında İran parlamentinin təbrizli deputatları - Şerdust, Məhdəri, Azərbaycanın İrandakı səfiri Abbasəli Həsənov, Təbrizin İrşadi İslami idarəsinin rəisi Bəşiri, İran Xarici İşlər Nazirliyinin Təbrizdəki nümayəndəsi Raşid, şəhər Ostandarlığının nümayəndələri, Təbriz rəssamları, şairləri, ziyalıları, bütün sənətsevərlər toplaşmışdılar. Açılış zamanı çıxış edənlər ölkələrimiz arasında mədəni əməkdaşlığın genişləndirilməsinin əhəmiyyətini dəyərləndirdilər. Beş gün davam edən sərgiyə sənətsevərlər böyük maraq göstərirdilər. Bunun bir səbəbi də o idi ki, apardığım tablolarda təbrizlilərin yaxşı tanıdıqları, tez-tez qarşılaşdıqları abidələr, yerlər təsvir olunmuşdu. “Kəndovan kəndinin mənzərələri”, “Şeyx Şaab məqbərəsi”, “Abbas Mirzə qalası”, “Üçtübin”, “Ərdəbil-Parsabad yolu” tabloları, “Şəhriyar” portreti haqqında təbrizlilərin fikrini öyrənmək mənim üçün maraqlı idi. Mən sərginin açılışında dediyim sözləri yenə də təkrar etmək istəyirəm: Əgər bu fərdi sərgim iki ölkə arasında dostluq və mehriban qonşuluq münasibətlərinin daha da möhkəmlənməsinə xidmət göstərərsə, mən özümü xoşbəxt hesab edərəm.
Bölmənin digər xəbərləri
